Додгоҳи ноҳияи Воҳидови шаҳри Қазон, пойтахти ҷумҳурии Тотористони Русия рӯзи 24 ноябри соли 2022 шаҳрванди 27-солаи Тоҷикистон Шамсиддин Бурҳонзодаро, ки дар бозори “Привоз” кор мекард, барои ду моҳ, то 21 январи соли 2023 ба ҳабс гирифт. Хабарнигори нашрияи маҳаллии “Реальное время” аз толори додгоҳ хабар дод, ки ҷавони тоҷикро бо иттиҳоми терроризм боздошт кардаанд.
Бино ба иттилои нашрия, мурофиа бо иштироки тарҷумон аз забони тоҷикӣ гузашт. Муфаттиши раёсати ФСБ ҷумҳурии Тотористон гуфт, парванда ба зидди муҳоҷири тоҷик рӯзи 21 ноябр боз шуда, ӯро алакай рӯзи 22 ноябр дастгир кардаанд. Худи Шамсиддин Бурҳонзода дар додгоҳ иттиҳоми эълоншударо ба дӯш гирифта, гуфтааст, ки аз соли 2020 дар Русия қарор дорад, вале сабти ном ва ягон кори расмӣ надошт.
Худи Бурҳонзода барои шарҳи парвандааш дастрас нест, вале фарзияи ФСБ гумонҳои зиёдеро ба вуҷуд меорад.
ФСБ мегӯяд, ки гӯё Шамсиддин Бурҳонзода аз ақидаҳои ифротӣ тарафдорӣ мекард ва мехост ба саффи террористҳо бипайвандад. Бо ин мақсад, бино ба иддаои мақомоти амниятӣ, ӯ аз 1 май то 1 сентябри соли 2022 бо аъзои созмони террористии дар Русия ва ҳам дар Тоҷикистон мамнӯи ДОИШ тамос барқарор карда, дар ҷараёни мукотиба дар шабакаи “Одноклассники” барои сафар ба шаҳри Идлиби Сурия, ки зери назорати ДОИШ қарор дорад, ва барои пайвастан ба саффи ҷангҷӯёни ин созмони террористӣ изҳори хоҳиш ва омодагӣ кардааст. Вале Бурҳонзода ин азми худро то охир амалӣ карда натавонистааст, чунки рӯзи 1 сентябри соли 2022 аз ҷониби пулис барои вайрон кардани қонунҳои муҳоҷирати Русия дастгир гардида, дар боздоштгоҳи муҳоҷирон ҷой карда шудааст.
Аз маводи парванда бармеояд, ки Бурҳонзодаро рӯзи 22 ноябр дар ҳамин боздоштгоҳи муҳоҷирон дастгир кардаанд
![](https://s2.save4k.ru/pic/IcQxTP_tRjA/maxresdefault.jpg)