Баспанаға деп алғашқы жарнасын жинай алмай жүрген азаматтарға қатысты жаңа заң қабылдануы мүмкін. Мемлекет енді тұрмысы төмен отбасылардың жалға алып тұратын тұрғын үй ақысын субсидиялауды ойластырып жатыр. Бұл табыс көзі отбасы мүшелеріне шаққанда 2 мың 900 теңгеден аспайтын жанұяларға қатысты екен. Ал дәл қазір "Бақытты отбасы" бағдарламасымен үй алып қалғысы келетін азаматтар конкурсқа сәйкес келмесе де, құжат тапсырып жан таласып әлек.
Екі күннің ішінде «Бақытты отбасы» бағдарламасына қатысуға 23 мыңнан астам азамат өтініш тастапты. Ал қарастырылған сома 50 миллиард теңге. Яғни 5 мың отбасының ғана баспаналы болуына мүмкіндік беріледі. Үйлі болуға үміттілердің ішінде тіпті Отан Соғысының ардагерлері де бар екен.
ЛӘЗЗАТ ИБРАГИМОВА, "Отбасы банк" ақ басқарма төрайымы:
– 3276 өтініш қабылданбады. Өйткені олардың ішінде мемлекеттік, бюджеттік, әскери қызметкерлер, ешқандай санатқа жатпайтындар да бар. Тіпті 3 соғыс ардагерінен өтініш келіп түсті. «Бақытты отбасы» бағдарламасына тек көп балалы, мүмкіндігі шектеулі бала тәрбиелеп отырған және толық емес отбасылар ғана қатыса алады.
«Бақытты отбасынан» қағылған, бірақ үй кезегінде тұрған барлық санаттағылар, енді «Шаңырақ» бағдарламасына өтініш бере алады. Ол үшін алғашқы 10 пайыз жарнаңыз дайын болуы шарт.
ЛӘЗЗАТ ИБРАГИМОВА, "Отбасы банк" ақ басқарма төрайымы:
– Бұл бағдарлама бойынша тек қана жаңадан салынған үйлерді алуға болады. Мамыр айында 8 мың пәтер баспана.кз сайтына шығарылады деп отырмыз.
Қаңтардағыдай енді бірден тұрғын үй бағасы қымбаттамайды дейді Индустрия және инфрақұрылымдық даму вице-министрі Қайырбек Өскенбаев. Өскенбаев, баға маусым-шілде айларынан бастап, қайта реттеледі деп отыр. Бірақ, құрылыс тауарлары толығымен отандық болған жағдайда ғана, тұрғын үй құны арзандайды. Сол үшін темірді Ресейге әлдеқайда қымбатқа сатып жатқан кәсіпорындарды өнімді өзімізде қалдыруға көндіріп жатырмыз дейді.
ҚАЙЫРБЕК ӨСКЕНБАЕВ, ҚР индустрия және инфрақұрылымдық даму бірінші вице-министрі:
– Әрине Ресейге қымбаттау бағасын беріп отыр. Бірақ біз айтып отырмыз, жалғыз темірді тапсырмай, жаңағы темірді тапсырып арматураны алып 3-4 есе бағасын көтересіңдер егер, біздің құрылысшыларға тапсырсаңдар деп.
Ал алғашқы жарнасы мен тұрақты жұмысы жоқ мүмкіндігі шектеулі бала тәрбиелеп отырған аналардың баспаналы болу мәселесін министрлік 1 жарым жылдан бері талқылап келеміз дейді.
ҚАЙЫРБЕК ӨСКЕНБАЕВ, ҚР индустрия және инфрақұрылымдық даму бірінші вице-министрі:
– Сатып алатын адам болса, оған мүмкіншілік жасаймыз. Жағдайына байланысты 2,5,7 пайыздан ба алуға мүмкіншілік береміз. Ал мысалы, жағдайы жоқ кісілер, несие рәсімдей алмаса, оларға субсидия ретінде жеке меншік тұлғалардан жалдауға үй алып, 80 пайызға дейін субсидиялау жасаймыз.
Яғни, Нұр-Сұлтан және Алматы қалаларында - 90, өзге өңірлерде 60, ал ауылдық жерлерде 45 мың теңгеге тұрғын үйді жалдап тұратын отбасыларға жалға алу ақысын субсидиялаймыз дейді министрлік. Уақытша көрсетілетін бұл мүмкіндік отбасы мүшелеріне шаққанда табысы 1 айлық есептік көрсеткіштен аспауы қажет екен. Бұл топқа көпбалалы отбасылар, жетім балалар мен мүгедек балалары бар жанұялар және әлеуметтік осал топтар жатады.
Әйгерім Ердәулет
Бізді әлеуметтік желіде оқыңыздар:
Youtube -[ Ссылка ]
Facebook - [ Ссылка ]
Instagram - [ Ссылка ]
Vkontakte - [ Ссылка ]
TikTok - www.tiktok.com/@informburo31
WhatsApp Информбюро +7 777 331 31 31
#БаспанаХит #7-20-25
