Сирия жанжалын реттеуде қазақ көшбасшысының үлесі зор болды.
Елімізге сапарлап келген Ресей Президенті Владимир Путин Нұрсұлтан Назарбаевқа Сирия қақтығысын реттеу жөніндегі келіссөздерді Астанада ұйымдастырғаны үшін алғыс білдірді. Мұнымен қоса қос ел басшылары еуразиялық ықпалдастық мәселелерін талқылап, серіктестік аясын кеңейтудің мүмкіндіктерін сөз етті.
Владимир Путин маңайындағы өзге бірде-бір көршісімен бұлай жиі кездеспейтін болар. Өткен жылы екі ел басшысы 6 мəрте жүздесіп, 12 рет телефон арқылы тілдесіпті.
Ал биыл Нұрсұлтан Назарбаев пен Путин Алатау бөктерінде алғаш рет жолығып отыр.
Ресей басшысының Орталық Азия аймағын аралауының стратегиялық маңызы зор. Кремль мен Орталық Азия елдерінің меңзегені бір.
Әріптестік байланыс пен халықаралық ұйымдардың шеңберінде аймақтағы тұрақтылықты қамтамасыз ету.
Бұл дегеніміз, Ресейдің оңтүстік шекарасының қауіпсіздігі. Еліміз аталған аймақтағы ең ірі мемлекеттің бірі екенін ескерсек, арадағы тығыз қарым-қатынастың орнауы тараптардың қай-қайсысына да тиімді.
Елбасы Нұрсұлтан Назарбаев күн тәртібіндегі өзекті мәселелерді қаузай келе, Ресеймен дипломатиялық байланыс орнаған жиырма бес жылдан бері алыс-беріс пен барыс-келіс жүйелі жүзеге асып отырғанын алға тартты.
Бүгінде Қазақстанда кәсіптен нәсіп тауып отырған Ресейдің жеті мың кәсіпорны соның айғағы болса керекті. Серіктестік аясын айқындайтын көрсеткіштердің еселенуіне Еуразиялық экономикалық одақтың да септігі көп.
