Махдуми Исмоил Пирмуҳаммадзода, маъруфтарин воизи муосири тоҷик, узви Шӯрои уламо ва имом-хатиби масҷиди марказии ноҳияи Ҳисор, рӯзи 18 майи соли 2022, ҳамагӣ чанд ҳафта қабл аз расиданаш ба синни мубораки 70, аз олам чашм пӯшид.
Махдуми Исмоил дар байни мардум нафақат бо мавъизаҳои пурбораш дар масоили динӣ эътибор ба даст оварда буд, балки ҳамчун як донандаи хуби адабиёти классику муосир бо тафсирҳои пурмаънии ашъори бузургони адабиёти мо дар ҷомиа, аз ҷумла дар миёни равшанфикрон аз обрӯ ва манзалати вижае бархӯрдор буд. Махдуми Исмоил худаш низ шеър менавишт.
Сабаби марги Махдуми Исмоил гуфта нашудааст. Тоза ҳафтаи гузашта ӯ дар Душанбе дар ду маҳфили муҳими фарҳангӣ: маҳфили адабии “Боргоҳи сухан” ва ҳам дар ҷашни 85-солагии ҳунарманди беҳамто Ҳошим Гадо иштирок дошт.
Аҳли дин ва ҳамчунин равшанфикрони тоҷик даргузашти Махдуми Исмоил Пирмуҳаммадзодаро як талафоти бузург ҳам барои арсаи дин ва ҳам барои аҳли фарҳанги Тоҷикистон меноманд.
