“Бизни хўрлашади, оёқ ости қилишади!” – Фарғонада она-бола шифокорни нега дўппослаган эди?

Жорий йилнинг 28 январь куни Фарғона шаҳридаги 2-оилавий поликлиникада тиббиёт ходимларига тажовуз қилиш ҳолати юз бергани ижтимоий тармоқларда катта норозилик келтириб чиқарди. Жароҳатланган ҳамшира ҳолати акс этган суратлар ижтимоий тармоқларда тарқалиб, кенг жамоатчиликнинг муҳокамасига сабаб бўлган.
Вазият Фарғона вилояти соғлиқни сақлаш бошқармаси мутахассислари томонидан ўрганилди. Дастлабки ўрганишлардан маълум бўлишича, воқеа ультратовуш текшируви (УТТ) ўтказиладиган хонада юз берган. Ультратовуш текшируви ўтказувчи шифокор Машҳура Тошматова ва унга бириктирилган ҳамшира Матлуба Маъмурова одатдагидек беморларни навбат билан қабул қилаётган бўлган.
“Фуқароларни навбат билан қабул қилиб текширувдан ўтказаётган эдик. Навбат 1992 йилда туғилган бемор қизга етиб келганида, у билан бирга хонага ёш бола кўтарган она ҳам кирди. Ёш болали аёл боласи касаллиги, инжиқлик қилиб тинимсиз йиғлаётгани, ташқарида ҳам 3 ёшли фарзанди совуқда изиллаб тургани, иккита бола билан қийналиб кетганини айтиб, навбатсиз кўрикдан ўтказиб қўйишни илтимос қилди.
Шунда мен навбати етиб кирган қизга “Агар рози бўлсангиз шу болали аёлни сиздан олдин кўриб қўйсам”, деб рухсат сўрадим. Қиз эса таклифимга кўнмай, ўзининг касал эканини айтиб, навбатини бермади. Шу боис унинг ўзини текширишни бошладим. Шу жараёнда қизга ёш болали аёлга навбатини берса, қанчалик савоб иш қилган бўлиши мумкинлигини тушунтириб насиҳат қилдим”, дейди шифокор Машҳура Тошматова.
Маълум бўлишича, шифокор қизни текширувдан ўтказиб, белгиланган тартибда ташхисни ёзиб беради. Қиз эса эшитган насиҳатдан асабийлашиб, хонадан чиқиб кетади. Кўп ўтмай хонага ёши катта бир аёл билан кириб келади. Аёл унинг онаси бўлиб, биргаликда тиббий кўрикдан ўтгани келганлиги маълум бўлади.
Аёл УТТ хонасига кирибоқ “Нега қизимни ҳақорат қиласанлар?” деб бақира бошлайди. Тиббиёт ходимлари вазиятни ҳарчанд тушунтиришса ҳам, аёл уларни эшитмай УТТ шифокорига электр чойнакни отиб юборади. Шунда ҳамшира аёлни тинчлантирмоқчи бўлиб, унинг ёнига келганида жазавага тушган она ва бола ҳамширага очиқчасига тажовуз қилиб, қўли билан уриб, оёқлари билан тепиб тан жароҳати етказади. Тўполонни эшитиб бошқа ходимлар хонага чиқиб, она ва болани ташқарига базўр олиб чиқиб кетадилар.
Тез ёрдам машинаси келиб, юзи қонга беланиб, ҳушидан кетган ҳамширани ўзига келтириб, биринчи ёрдам кўрсатгач, оғир ҳолатда Республика шошилинч тиббий ёрдам илмий маркази Фарғона филиалига олиб кетади.
Филиалда беморни нейрохирург ва бошқа малакали мутахассислар иштирокида кўрикдан ўтказилиб, “Ёпиқ калла мия жароҳати, бош мия чайқалиши, бурун суяги синиши, бурундан қон кетиши” ташхиси билан нейрохирургия бўлимига стационар даволаниш учун ётқизилди. Ҳозирда малакали шифокорлар томонидан беморга зарур даво муолажалари амалга оширилмоқда.
Шуни таъкидлаш жоизки, юқоридаги жанжалкаш она-бола томонидан ўтган йил 18 январь куни Республика шошилинч тиббий ёрдам илмий маркази Фарғона филиали 3-тез тиббий ёрдами подстанцияси ҳамшираси Дилафрўз Бозоровани ҳам сабабсиз ҳақорат қилиб, таҳдид қилганда аранг қочиб қолганлиги қайд этилган. Ушбу ҳолатга нисбатан ҳеч қандай чора кўрилмаган эди.
Президент Шавкат Мирзиёев Олий Мажлис палаталарига навбатдаги Мурожаатномасида барча соҳа ва йўналишлар ҳақида тўхталар экан, тиббиёт ходимларининг мақоми ва обрўини ошириш кераклигига алоҳида эътибор қаратди. Жумладан, ижтимоий тармоқларда тиббиёт ходимларига нисбатан бўлаётган зўравонликларга тўхталиб, бу ўзбек менталитетига умуман тўғри келмаслигини, буни ҳеч нарса билан оқлаб бўлмаслигини, шу боис, шифокорларнинг мақоми ва обрўини ошириш шартлигини таъкидлаб ўтди.
Мазкур ҳолат юзасидан Фарғона шаҳар ИИО ФМБ хузуридаги Тергов бўлими томонидан Ўзбекистон Республикаси ЖКнинг 109-моддаси 2-қисми билан жиноят иши қўзғатилиб, тергов ҳаракатлари олиб борилмоқда.
EFFECT.UZ ахборот агентлиги Фарғона шаҳридаги 2-оилавий поликлиникага бориб, тажовузга учраган тиббиёт ҳодими билан суҳбатлашди. Вазият қандай содир бўлгани ойдинлашди.

Батафсил: [ Ссылка ]

Официальный сайт: [ Ссылка ]
Instagram [ Ссылка ]
Telegram [ Ссылка ]
Facebook [ Ссылка ]
Twitter [ Ссылка ]
ВКонтакте [ Ссылка ]
Одноклассники [ Ссылка ]

свернуть