Менин жашым 18 де. Эки жарым жыл сүйлөшкөн жигитим менен төрт ай мурун сүйлөшпөй калдым. Андан көңүлүм калды. Кайра аны менен мамилемди улагым келбейт, бирок ар бир баланын кемчилигин издей берчү болдум. Бул адат менде улана берсе турмуш кура албай каламбы деп корком. Кандай чара колдонсом болот?
Негизи 18 жашта баардык нерсени сын көз менен карап турчу учур. Бирок бул жерде тарбия дагы роль ойной алат. Эгерде буга чейин баарына сын көз менен карап, талдап тарбияланган болсоң, анда 18 жашта баарын чукулап сын көз караш менен карап калгансың. Сага айтаарым бул жаман сапат. Баарына эле сын көз караш менен караганга болбойт. Эч качан баардык нерсеси төп келген адам болбойт, адам деген оош-кыйышы менен болот. Демек жакшы жагын караганга, жакшы жагын көргөнгө аракет кылуу керек. Сенин айтымыңа караганда адамдын терс жагына көп көңүл бурасың да, жакшы жагына көңул бурбайсың. Багытыңды оңдо, адамдын көңүлгө төп келчү жактары болоорун унутпай, аны көрө билгенди үйрөн. Бул нерсени үйрөнсөң турмушка чыгасың.
