Lənkəranda evə basqın edildi – 63 yaşlı sakin bıçaqlanaraq öldü
Gecə saatlarında Lənkəranın Liman şəhərində evə basqın olub. Ağır xəsarətlər alan ailə üzvlərindən biri ölüb, digəri isə xəstəxanaya yerləşdirilib
Lənkəranın Liman şəhəri, Telman Bağırov 32 ünvanında yerləşən evə gecə saatlarında kimliyi hələlik istintaqa məlum olmayan şəxs hücum edib. Nəticədə 63 yaşlı Arifə Nəcəfova və onun qızı, 40 yaşlı İlahə Nəcəfova kürək və qol nahiyələrindən çoxsaylı bıçaq xəsarətləri alıblar. Xəsarət alan hər iki sakin Lənkəran Rayon Mərkəzi Xəstəxanasına çatdırılıb və əməliyyat ediliblər. Həkimlərin müdaxiləsinə baxmayaraq 63 yaşlı qadının həyatını xilas etmək mümkün olmayıb.
Həkim Rasif Axundov: “Digər xəstə İlahə Nəcəfova sol döş qəfəsinin kəsilmiş deşilmiş yaraları ilə daxil olmuşdur. Xəstə təcili əməliyyata götürülmüşdür. Hal-hazırda xəstə orta kafi vəziyyətdə reanimasiya şöbəsinə yerləşdirilmişdir.”
Yaxınlarının deməsinə görə hadisə zamanı evdə İlahə Nəcəfovanın azyaşlı oğlu da olub. O, anasının və nənəsinin vurulduğunu pəncərədən görüb və mobil telefonla dayısına zəng vurub. Qonşular həmin vaxt səsə gəlsələr də evə girən şəxsi yaxalaya bilməyiblər. Hadisəni törədən şəxsin kimliyinin müəyyənləşdirilməsi istiqamətində əməliyyat-istintaq tədbirləri həyata keçirilir. Faktla bağlı Lənkəran Şəhər Rayon Polis şöbəsində araşdırma aparılır.
