Қабдеш Жұмаділов – қазақ прозасын классикалық туындыларымен байытқан жазушы. Қаламгер шығармаларының өзегі – ел тарихы мен тағдыры, салт-дәстүрі мен ұлттық құндылығы. Автор «Жеті ата» әңгімесінде де қазақ халқының байырдан келе жатқан ата салтын сөз етеді. Әңгімеден қазақ халқының шежірелік жүйесінен бөлек, бір ауыз сөзге тоқтаған даналығы, ауызбіршілігі, дархандығы, шынайылығы, көрегендігі танылады.
Шығарма кестелі сөз өрнегімен, оқиға өзектілігімен ерекшеленеді. Бір- бірін шын ұнатқан екі жастың қосылуын ақыл тоқтатқан ел ағалары құптамайды. Басты себеп – қос ғашық жеті атаға толмаған бір рудан. Алайда басты кейіпкерлердің ісін ақтап алуға да, құптамауға да себеп көп. Шиеленіскен дауды жазушы екі жасқа рұқсат беріп, оларды қосу арқылы түйіндейді. Ал сіз мұндай жағдайда дауға қандай тоқтау айтар едіңіз, оқырман?
