“Майли, қамашмасин уни, лекин пулларимизни қайтариб беришсин”
Хоразм вилоятининг Урганч шаҳри марказида ҳафта бошида чет элдаги иш илинжида “Human” бандлик агентлигига пул ўтказган 50дан ошиқ фуқаролар норозилик намойишини ўтказдилар.
Улар Германия, Чехия, Туркия каби давлатлардаги иш ўринлари учун агентлик ҳисоб рақамига 18 дан 35 миллион сўмгача бўлган миқдордаги маблағни ўтказганлар.
Тошкент шаҳар Ички ишлар Бош бошқармаси тарқатган хабарномада ҳисоб рақамга 1 670 500 000 сўм келиб тушгани айтилади, аммо арздорларга кўра бутун республика бўйлаб 1 000дан ошиқ кишининг пули ҳисобланса, бу кўрсаткич анча каттароқ экани намоён бўлади.
Душанба куни Би-би-си “Human” агентлиги ва унга иш лицензиясини тақдим қилган Бандлик ва Меҳнат муносабатлари вазирлигига Фарғона водийсидан жавоб излаб келган ўнлаб фуқароларга ҳамроҳлик қилган эди. Уларга кўра, барча мутасадди ташкилотлар бу масала уларнинг ваколатига кирмаслигини айтиб сарсон қилмоқда.
Би-би-си мазкур масала юзасидан Бандлик ва Меҳнат муносабатлари вазирлиги билан душанба куни боғланди. Вазирлик вакили бу борада тез орада расмий изоҳ берилишини айтди, аммо бир неча кундирки изоҳ йўқ.
“Human” агентлиги раҳбари тергов қилинмоқда, аммо арздорлар улар учун уни жазолашдан кўра, пуллари қайтарилиши муҳимроқ эканини айтишмоқда.
