Күн өткөн сайын адамзат үчүн табышмак бойдон калган, эч ким билбеген, тарыхтын тээ түпкүрүндө калып кеткен маалыматтар археологиялык казуулардын, же тарыхый жазма булактардын изилденүүсүнүн натыйжасында ачыка чыгууда. Бирок бул ачылыштар 1400 жыл мурун эле Куранда жазылып калуусу менен көпчүлүктү таң калтырууда. Куран адамзат үчүн кайып бойдон калып кеткен кабарларды бизге так берүүдө. Бүгүн биз Курандын дагы бир тарыхый кабарына назар салып көрөлү.
Фараондун өлүмү жана Муса АС. Курандын Бакара сүрөсүнүн 50-аятында Аллах мындай дейт:
“Биз силер үчүн деңизди кандайча жарып бергенибизди жана Фараондун тарапкерлерин чөктүргөнүбүздү өзүңөр көрүп турдуңар”
(Бакара-50)
“Аяттарыбызды жалганга чыгарып, ага кайдыгер мамиле кылгандыктан аларды деңизге чөктүрүп өч алдык”
(Араф-136)
“Алар Эгесинин аяттарын жалганга чыгарышты. Аларды күнөөлөрү себептүү кыйратып, Фараондун коомун сууга чөктүрдүк. Алардын баары заалым болушкан эле.”
(Анфал-54)
“Эки топ бири-бирин көргөн кезде, Мусанын жолдоштору “Колго түшөөрүбү шексиз”-дешти. (Муса): “Эч качан! Чындыгында Эгебиз биз менен бирге. Ал мага жол көрсөтөт”-деди. Биз Мусага: “Таягың менен деңизди чап”-дедик. Ошондо (деңиз экиге тең бөлүнө) жарылып, ар бир бөлүгү аскар тоодой болду. Арткыларды да ошол жерге жакындаттык. Мусаны жана аны менен чогуу болгон адамдардын баарын куткардык. Анан башкалардын баарын сууга чөктүрүп жибердик.”
(Шуара 61-65)
Демек аятта айткандай Фараон Муса АСды жана аны ээрчигендерди кууп бараткан кезде деңиз ачылат да Муса ас жолдоштору менен өтүп кетет. Артынан Фараон адамдары менен кууп келаткан кезде деңиз кайра жабылып, суунун астында калып кетишет. Фараондун өлүмүн Куран бизге ушундай сүрөттөп берүүдө.
Бул окуя тууралуу азыркы күндүн тарыхы эмне дейт. Англиядагы Британия музейинде Фараондордун доорунан бери сакталып калган 6-номердеги папирустун текстине карап көрөлү. Ал жерде мындай деп жазылган:
“Сарайдын ак бөлмөсүнүн коргоочусу, китептеринин жетекчиси Аменамониден, катчы Пентерхорго. Бул кат сага жеткен кезде, үтүр чекитине чейин окуган кезиңде, жүрөгүңдү сыздата турган аянычтуу окуяны, толкунда чөгүү сыяктуу кайгылуу окуяларды үйрөнгөн кезиңде ушундай кыл. Бороон чапкын алдында турган жалбырак сыяктуу жүрөгүңдү эң оор муң кайгыга салып бер! Жоготубуз оор. Зарылчылык аны күтүүсүздөн алып кетти. Суу ичиндеги уйку аянычтуу бир иш кылды. Падышанын өлүмүн, коомдордун кожоюнун, чыгыш менен батыштын башкаруучусунун жок болуусун сүрөттө. Сага жөнөткөн ушул кабарга кайсы окуя тең келе алат”
British museum, Egyptian papyrus № 6
Мынакей оо менин бир тууганым! Бул папируста Фараондун чөгүп кеткендиги тууралуу ачык эле айтууда. Кереметтүү Курандын тарыхый аяты жазма булактын негизинде да тастыкталды. 19-20 кылымдарда гана араң ачыка чыккан бул маалыматтардын 14 кылым мурун Куранда жазылып калуусу чынында керемет эмеспи? Демек Куран бул бүткүл нерслерди башкарган Аллахтын сөзү дебеске айла калбайт.
Биз мусулмандар болсо Кураныбызды, динибизди дагы да тереңирээк изилдөөбүз керек. Башка жактан издеген суроолордун, чаралардын жообу албетте Кураныбызда, динибизде бар. Аллах бизди өз динин терең изилдегендерден кылсын!
