Доҕорбор (Түүлэй түүнү сырдатар). Афанасий Шестаков тыллара/мелодията.
*****
Шестаков Афанасий Федорович (1925, Нам улууһа, Бөтүҥ нэһилиэгэ - 1993) - ырыа айааччы. Аҕа дойдуну көмүскүүр Улуу сэрии кыттыылааҕа.
Ырыалара: «Доҕорбор» («Түүлэй түүнү сырдатар»), «Нам сирэ» о. д. а.
*****
Түүлэй түүнү сырдатар,
Сулустары санатар,
Мичилийэр мичээриҥ
Эймэнитэр сүрэхпин.
Күндү сэгэрим,
Таптыыр доҕорум,
Истиий тойукпун.
Нуоҕалдьыйар мөссүөнүҥ
Сир симэҕин санатар.
Дьиэрэһитэр куолаһыҥ
Күөрэгэйдии чугдаарар.
Олох мэһэйдэриттэн
Уостуо суоҕа тапталбыт,
Сылайары билбэккэ
Мэлдьи миигин арыаллыаҥ.
Үчүгэйиэн, көмүһүөм,
Үөрэ-көтө сылдьарбыт,
Эйигинниин дьолбутун,
Кэскилбитин айарбыт.
Ещё видео!