Отандастарымыз көрші елден көлік айдап келіп, тұрмыстық техника мен құрылыс материалдарын тасыса, ресейліктер Қазақстаннан алкоголді сусындарды көптеп сатып алады екен.
Ардақ Айбарұлы, тілші
- Біз қазір Қазақстан-Ресей шекарасының ортасындағы бейтарап аймақта тұрмыз. Шекараның арғы беті Ресей Федерациясының Самара облысы. Ресей рублі құлағалы бері мұнда көлік нөпірі қайтадан көбейген сияқты. Қазір менің жанымда «Сырым» шекаралық бақылау бөлімінің бастығы Әділби Кереев мырза тұр. Әділби қазіргі жағдай қалай мына шекарадағы?
Әділби Кереев, ҚР ҰҚК Шекара қызметіне қарасты «Сырым» шекаралық бақылау бекетінің бастығы
- Қазір шекарадағы жағдайымыз, рубль құлағалы бері қазақстандық азаматтар және де Батыс Қазақстан облысының тұрғындары Ресей Федерациясына шығуға тырысып жатыр.
- Көлік айдап келіп жатқандар көп пе?
- Көлік айдап келіп жатқан, электроника дейді, телевизор, тұрмыстық техника тасып жатқандар көп. Демалысқа шығып жатқан адамдар көп. Қазір демалыс сезоны ашылып жатыр.
Батыс Қазақстан облысының тұрғындары көбіне алыс шетелдерге Самара халықаралық әуежайы арқылы ұшады. Қазақстан-Ресей шекарасындағы көлік нөпірі көктемдегідей емес, дегенмен соңғы уақытта отандастарымыздың Ресейге баруды үдете түскені байқалады. Олар негізінен тауар тасумен айналысады.
Айбек Мералиев, Орал қаласының тұрғыны
- Құрылыс заттарын тасимын. Күнде жүріп тұрамын. Түнде Алла қаласа кері шығамын. Иә, сол Ресей жағында соңғы кездері тұрып жатырмыз. 2-3 сағаттап тұрамыз. Ал мына жақтан ары кеткенде 15 минут.
- Қазақстанның шекарасынан?
- Иә, Қазақстанның шекарасынан.
Ардақ Айбарұлы, тілші
- «Сырым» шекаралық бақылау бекеті арқылы күніне 6 мыңдай адам өтеді екен. Соның 80 пайызы Кеден Одағына мүше елдердің азаматтары болса, қалған 20 пайызы алыс және жақын шет елдердің азаматтары. Ресей рублінің құлдырауына байланысты пайда болған көлік нөпірі осыдан 1-2 күн бұрын Қазақстанның шекарасына дейін жеткен. Бүгін көлік соншалықты көп емес, бірақ баршылық. Ресей шекарашыларының жағдайды қашан реттері әзірге белгісіз.
Авторлары: Ардақ Айбарұлы, Болат Жарылғасов, Қанат Махмұтов
