Қазақстан Парламенті Мәжілісінің депутаттарын сайлауға бірқатар өзгерістер енгізілгені белгілі. Енді сол түзетулерге тоқталсақ.
Яғни, алдағы саяси науқанның басты ерекшелігі — аралас сайлау жүйесі бойынша өтетіндігі болып отыр. Сондай-ақ, бұған дейін Мәжілісте 107 депутат болса, енді Қазақстан халқы ассамблясына тиесі 9 мандат жойылады. Сәйкесінше, партиялық тізім бойынша 69, бір мандатты округтан 29 депутат сайлана алады. Яғни, 70 пайызы пропорцианалды, 30 пайызы мажоритарлық негізде. Ал облыс және республикалық маңызы бар қалалардың мәслихаттары 50\50 қағидаты бойынша құрылады. Аудан және облыстық маңызы бар қалалардағы мәслихат депутаттары 100 пайыз бір мандатты округтер арқылы сайланады. Әрі саяси партияларды тіркеу де айтарлықтай жеңілдетіліп отыр. Мәселен, енді партия мүшелерінің санына қарай төменгі шегі 20 мыңнан 5 мыңға дейін азайтылды. Сөйтіп, азғантай уақыт ішінде «Байтақ», «Республика» секілді тағы екі саяси ұйым қосылып, партиялар саны жетіге жетті. Ал олардың Мәжіліске өтуіне қажетті дауыстың төменгі шегі 7-ден 5 пайызға дейін төмендеді. Сонымен қатар, сайлаушыларды науқанға белсенді түрде атсалысуға ынталандыру үшін кандидаттарға әлеуметтік желілер арқылы үгіт-насихат жүргізуге рұқсат беріліп отыр. Бұл науқан үміткерлерді тіркеу аяқталған сәтте демек, 18 ақпан күні сағат 18:01-де басталады.
