«Այսօր կանգնած ենք մեր տղաների անունների և անմահ հայացքների դիմաց և ոչ թե իրենց ենք մեծարում, որովհետև իրենք մեր մեծարման կարիքն ու անհրաժեշտությունը չունեն, այլ ինքներս մեզ ենք չափում նրանց ներկայությամբ։

Մեր տղաները հաղթանակի տեսիլքով մեկնեցին՝ մեզ թողնելով այդ հաղթանակը ամբողջացնելը, մեզ թողնելով իրենց պարտության չմատնելը։
․․․
Դուք Բերդավան գյուղում և ամբողջ սահմանագծին ապրել եք թշնամու հայացքի և մեր կյանքը խլել ցանկանալու սպառնալիքի ներքո, առանց քայլ իսկ նահանջելու։ Թշնամու բարձրագույն նպատակը եղել է, մնում է և հավիտյանս հավիտենից մնալու է մեր կյանքի սպառումն ու ոչնչացումը։ Դուք ձեր կյանքն ամբողջությամբ կառուցել եք այստեղ, չեք փախել, չեք նահանջել, ճանապարհներ չեք փնտրել, որպեսզի կարողանաք այս կամ այն ձևով ձեր կյանքի փափկությունը գտնել։ Ձեր կյանքի վայելքը եղել է թշնամու փամփուշտը գրկելը։
․․․
Ծնողներ ջան, ընտանիքներ ջան, խնդրում եմ ՝ ձեր արցունքները, տառապանքն ու ցավը խեղճության համար չլինեն։ Դուք խեղճ չեք, դու ՄԵՌԵԼԱՏԵՐ չեք, որքան ուզում է ձեզ համոզեն։

Մահն ամեն մեկի դուռն էլ բախելու է, մեծ ու փոքր չի ճանաչելու, մեզ էլ է գալու, հանգչելու ենք կամ անհանգիստ ենք լինելու իրենք՝ նահատակներն են մնալու մինչև վերջ, իրենք են լինելու ամենակենդանին ու ողջը, ոչ թե մենք։
Ձեր գլուխները կախ չեն կարող լինել, մեր գլուխներն են կախ ձեր առջև, մեր Հայրենիքի ու մեր տղերքի առջև։
Խաղաղություն ձեզ, սիրելի՛ ընտանիքներ։ Օրհնե՛ք մեզ, որպեսզի կարողանանք մեր տունը վերականգնել» - Բագրատ եպիսկոպոս Գալստանյան (Տավուշեցի):

Հուշահամալիրի բացում և խաչքարի օծում Բերդավանում
09․01․2022
#ԲագրատՍրբազան #ՏաՀույս

свернуть