Տրիպոլիի կառավարությունը հայտնում է, որ Լիբիայում կռվող 1600 ռուսաստանցի «վագներականներ» օդանավերով հեռացել են Տրիպոլիի մատույցների ռազմական գործողությունների գոտուց: Թե ուր են հեռացել, Տրիպոլիի կառավարության աղբյուրը չի հայտնել:
Լիբիայում տեւական ժամանակ բավական թեժ է: Թուրքայի աջակցությունն ունեցող կառավարական ուժերը ուժեղ հարվածներ են հասցրել Ռուսաստանի աջակցությունը վայելող գեներալ Հավթարի բանակին, որը հասել էր Տրիպոլի: Հավթարն ունեցել է կորուստներ, այդ թվում ռուսական սպառազինության: Կորուստները եղել են թուրքական անօդաչուների հարվածի հետեւանք: Հավթարի հրամանատարները օրերս հայտարարել են, որ կլինի օդային աննախադեպ հակահարված: Ենթադրվում է, որ դա կիրականացվի ռուսական ռազմական կործանիչների եւ գրոհային օդանավերի միջոցով: Ըստ ԶԼՄ-ների՝ Ռուսաստանը Սիրիայից Լիբիա է տեղափոխել 6 Միգ 29 եւ 2 Սու 24:
Այդ դեպքում ինչու՞ են հեռանում «վագներականները», կամ ու՞ր են հեռանում, եթե Ռուսաստանը պատրաստվում է ուժեղ հակահարվածի: Թե՞ Մոսկվան փորձում է անցնել օդային «պատերազմի», հետ քաշելով ցամաքային ուժերը եւ ցամաքը թողնելով լոկ Հավթարի բանակին: Մոսկվան գնում է վերադասավորման եւ հակահարվածի՞, թե պատրաստվում է Թուրքիայի հետ գործարքի:
ԶԼՄ-ները տեղեկություն են տարածել նաեւ, որ Թուրքիան իր հերթին 300 վարձկան է Սիրիայից տեղափոխում Լիբիա:
Լիբիան 2020 թվականից ի վեր երկրորդ թեժ կետն է, որտեղ ռազմական բախման են հանգում Թուրքիան ու Ռուսաստանը: Փետրվարի վերջին, մարտին դա Սիրիան էր, այժմ՝ Լիբիան: Նախկինում Մոսկվային ու Անկարային հաջողվում էր խուսափել ռազմական լուրջ բախումներից եւ դիմակայությունից:
Ինչու՞ է 2020 թվականը տարբերվում էապես: Երբ 2020 թվականի հունվարի 3-ին ԱՄՆ Բաղդադի օդանավակայանում սպանեց իրանցի գեներալ Սոլեյմանիին, որը առանցքային ֆիգուր էր թե իրանյան, թե ռեգիոնալ քաղաքականության համար, հրապարակումներից մեկում կանխատեսեցի, որ նոր իրավիճակը սրելու է Թուրքիաի եւ Ռուսաստանի հարաբերությունը: Բաղդադում ԱՄՆ հարվածը թե քաղաքական, թե հոգեբանական առումով նոր իրավիճակ է ստեղծել: ԱՄՆ-ից ուժեղ հարված ստացած Իրանը լրացուցիչ փաստարկներ էր ձեռք բերել Աստանայի ձեւաչափի մյուս երկու մասնակիցների հանդեպ: Հատկանշական է, որ դրանից հետո Ռուսաստանն ու Թուրքիան խուսափում են այդ ձեւաչափով Իրանի հետ հանդիպումից:
Նյութի աղբյուր՝ lragir.am
![](https://i.ytimg.com/vi/NelwG9wYJIM/maxresdefault.jpg)