Azərbaycan 1991-ci ildə dövlət müstəqilliyini bərpa etdikdən sonra Avropa İttifaqı ilə əlaqələri bütün sahələr üzrə inkişaf etdirib. Hazırda bu münasibətlər ən yüksək səviyyədə olması ilə seçilir. 18 iyul 2022-ci il tarixində Azərbaycan ilə Avropa İttifaqı ara¬sında “Avropa Komissiyası tərəfindən təmsil olunan Avropa İttifaqı ilə Azərbaycan Respublikası arasında enerji sahəsində Strateji Tərəfdaşlığa dair Anlaşma Memorandumu” imzala¬ndı. Sənədi Azərbaycan Respublika¬sının Prezidenti İlham Əliyev və Avro¬pa Komissiyasının prezidenti xanım Ursula Fon der Lyayen imzaladılar. Memorandumun əsas mahiyyəti Azərbaycan qazının sabit və təhlükəsiz şəkildə Aİ-yə çatdırılmasının təmin edilməsidir. Burada söhbət kommersiya məqsədəuyğunluğu və bazar tələbinə uyğun olaraq qaz tədarükünün şaxələndirilməsini dəstəkləmək məqsədilə Xəzərin Azərbaycan sektorundakı təbii qazın Aİ-yə və Qərbi Balkan ölkələrinə daşınmasından gedir.
Görüşdən sonra xanım Fon der Lyayen Prezident İlham Əliyevlə birgə mətbuat konfransı keçirib, bəyanatlarla çıxış etdilər. Prezident İlham Əliyev vurğuladı ki, bugünkü memorandum əməkdaşlığın gələcəyi üçün yol xəritəsi rolunu oynayır. Prezident qeyd etdi ki, Azərbaycanın bu sahədəki səyləri Avropa İttifaqı tərəfindən də dəstəklənib. Avropa İttifaqının Azərbaycanın ən iri ticarət tərəfdaşı və əsas ixrac bazarı olduğunu vurğulayan xanım Fon der Lyayen qeyd etdi ki, sərmayə qoyuluşu baxımından da Azərbaycan ən vacib mənbələrdən biridir.
Avropa Komissiyasının Prezidenti Ursula von der Lyayen Bakıda olarkən səfərinin mahiyyətinə aydınlıq gətirmək məqsədilə “Twitter” hesabında yazıb: “Avropa İttifaqı daha etibarlı enerji təchizatçılarına müraciət edir. Bu gün mən yeni müqavilə imzalamaq üçün Azərbaycandayam. Məqsədimiz bir neçə il ərzində Azərbaycandan Aİ-yə qaz nəqlini iki dəfə artırmaqdır. Azərbaycan təchizat təhlükəsizliyimiz və iqlim neytrallığına gedən yolda həlledici tərəfdaşımız olacaq”.
Rəsmi Brüssel Azərbaycanı etibarlı tərəfdaş adlandırır. Qurum 2027-ci ilədək Azərbaycandan hər il azı 20 milyard kubmetr “mavi yanacaq” almaq niyyətindədir. Bu baxımdan, Anlaşma Memorandumu Aİ üçün çox vacibdir, çünki onu təbii qaz asılılığından qurtarır və enerji təchizatı təhlükəsizliyini təmin edir. Rəsmi Bakı da bu vəsilə ilə ölkənin ərazi bütövlüyü və suverenliyinə hörmət olunmasını, dəstəklənməsini beynəlxalq ictimaiyyətdən daha qəti şəkildə tələb edəcək. Azərbaycanla Ermənistan arasında sülhün bərqərar olması və qorunması üçün bu saziş qoruyucu qalxan rolu oynayacaqdır.
Sazişin imzalanması bir daha sübut edir ki, respublikamızın gerçəkləşdirdiyi enerji siyasəti bütövlükdə regionun siyasi və iqtisadi inkişafına, rifahına xidmət edir. Azərbaycan bu gün Avropa, bütövlükdə dünya enerji bazarında aparıcı qüvvədir. Azərbaycan bu razılaşma ilə təkcə Avropa İttifaqının qaza olan tələbatının ödənilməsinə yardım etmir, həm də Birliyin təhlükəsizliyini, demokratik dəyərləri, quruma üzv dövlətlərin suverenliyini müdafiə edir. Rəsmi Bakı Avropanın bütövlüyünü qorumaqla yanaşı, onu asılılıqdan qurtarır. Həyata keçirilən məqsədyönlü və praqmatik siyasət nəticəsində Azərbaycan Respublikası beynəlxalq enerji təhlükəsizliyi sisteminin başlıca subyektlərindən birinə çevriləcək.
![](https://s2.save4k.ru/pic/O4NBkpMlFxs/maxresdefault.jpg)