Гитлер Германиясининг тарғибот вазири Йозеф Геббельс: “Менга оммавий ахборот воситаларини беринг! Ва мен ҳар қандай халқдан чўчқалар тўдасини ясаб бераман” – деган.
Халқдан чўчқалар тўдасини ясаш кимга ва нима учун керак?
Бу саволга ўша фашист Йозеф Геббельс: “Халқ ўзининг истаганини эмас, ҳукмдор элитанинг, иқтидордаги партиянинг истаганини қилиши керак. Бунинг учун халқ онгини ғоявий “чўпчак”лар ёрдамида манипуляция қилиш лозим” – деб жавоб берган.
“Факт ва Фикр”нинг бугунги сонида ўз халқларини чўчқаларга айлантириш пайида юрган ҳукуматларнинг ғоявий “чўпчак”лари ҳақида сўз юритаман.
Ўз халқларини ухлатиш, улардан чўчқа ясаш билан тарихда кўп золим ҳукуматлар шуғулланишган. Лекин фақат Гитлер Германияси, аниқроғи, унинг халқ таълими ва тарғибот вазири Йозеф Геббельс бу ишни қўштирноқ ичидаги “санъатга”, тинмасдан ёлғон ишлаб чиқарувчи давлат машинасига айлантира олган.
Кўрсатувни айнан фашист Йозеф Геббельснинг машҳур ибораларидан бошлаганимнинг сабаби ҳам шунда. Унинг нутқларида янграган, мақола ва кундаликларида ёзилган фикрлар билан танишсангиз, бугунги кунда, 21 асрда ҳам ўз халқларидан чўчқалар тўдасини ясаш ниятида юрган ҳукуматларни дарров таниб оласиз.
Ўтган асрнинг 30 йилларида Адольф Гитлер ва унинг ортида турган чўян қироли Альфред Крупп бошчилигидаги олмон олигархларига катта бойлик орттириш учун катта уруш керак эди. Танк, тўп, автомат ва бошқа қуролларга талаб бўлиши учун уруш керак эди.
Лекин олмон халқини урушга сафарбар қилиш осон иш эмас эди. Чунки Германия биринчи жаҳон урушида кўрган талафотларни ҳали эсдан чиқармаган эди. Гитлер ва унинг ортидаги олигархларга урушдан безиган олмон халқида яна уруш иштиёқини ёқа оладиган устаси фаранг тарғиботчи керак эди.
Шунда Адольф Гитлер бу вазифани ўзининг партиявий сафдоши Йозеф Геббельсга юклайди. Чунки бу пайтгача Геббельс ўзининг ноёб нотиқлик ва топқирлик қобилиятини кўрсатиб бўлган эди. Масалан, 1927 йилда Геббельс нацистлар партиясига қарашли «Der Angriff» («Хужум») газетасини газета очилишидан олдинроқ муваффақиятли реклама қила олган эди.
Геббельс чиқарилиши кутилаётган «Der Angriff» («Хужум») газетасининг илк рекламасида одамларга қарата: “Хужум”га тайёрмисизлар?” – деган савол берган. Иккинчи рекламасида эса: “Биз хужумга 4 июль куни ўтамиз. Сиз-чи?” – деган. Одамлар орасида шов-шув мунозаралар пайдо бўлган: қандай хужум, кимга қарши? ва ҳоказо. Ва 4 июль куни Геббельс “Хужум” газетасининг илк сонини чиқарган.
Афсуски, Йозеф Геббельс ихтиро қилган мана шундай жирканч сиёсий ва ғоявий технологиялар 21 асрда ҳам дунёнинг кўплаб нодемократик мамлакатларида халқларга нисбатан қўлланилмоқда.
Масалан, ўзимизнинг Марказий Осиё минтақасини олайлик.
Каримов режимининг тарғиботи таъсирида ўзбеклар Ўзбекистонни келажаги энг буюк давлат деб ҳисоблай бошлашди.
Имомали Раҳмон диктатурасининг чўпчакларига ишонган тожиклар эса ўзларини минтақадаги энг орий ва қадимий миллат деб кўра бошлашди.
Назарбоев режимининг ғоявий ёлғонлари натижасида қозоқлар ҳатто Чингизхонни қозоқ бауримиз деб, шу қонхўр билан фахрлана бошлашди.
Қирғизистондаги тарғибот машинаси эса “Одам ато ва Момо Ҳаво асли қирғиз бўлган” – деган чўпчакни ўйлаб топиш ва эълон қилишдан уялиб ўтирмади.
Туркманистондаги диагноздан хабарингиз бўлса керак. У ерда давлат тарғибот машинаси президент Сапармурот Ниязовни янги пайғамбар деб, унинг “Руҳнома” китобини эса муқаддас китоб деб эълон қилди.
Оқибатда минтақада ҳар бир миллат фақат ўзини зўр деб, қўшнисини паст деб кўра бошлади. Миллатлар бир-бирларига нисбатан ички адоват тўплай бошлашди. Ўз халқларини эзаётган минтақа диктаторларига айнан шу керак эди.
Нацист Йозеф Геббельснинг тавсияларига амал қилишда Каримов режими ҳаммадан илгарилаб кетди. Нацистлар Рейхстагни ўзлари ёқиб, бу жиноятда рақиблари коммунистларни айблашган ва қатағон қилишган бўлса, Каримов 16 февраль портлашларини ўзи уюштириб, уни содир этганликда диний ва демократик мухолифат айблади ва қамоқларга ташлади.
Ўзбеклар учун ғоявий чўпчакларни ўйлаб топиш, душман образини яратиш ва бошқа ғоявий фирибгарликларни амалга оширишда Стратегик ва минтақалараро тадқиқотлар институти таҳлилчилари ҳамда Миллий Хавфсизлик Хизмати экспертлари бош-қош бўлишди.
“Факт ва Фикр”нинг навбатдаги, 11-сонида мустақил Ўзбекистонда халққа сингдирилган ғоявий “чўпчак”ларнинг ОЛДИ-10 талигини эътиборингизга ҳавол қиламан.
Гитлер Германиясининг тарғибот вазири Йозеф Геббельс: “Ҳар қандай тарғиботнинг энг катта душмани – интеллектуализм, билимдонликдир” - деган.
Шунинг учун китоб ўқинг, фактларни ўрганинг ва фикр қилинг!
Ҳукумат сиздан чўчқа ясашига асло йўл қўйманг!
Бобомурод Абдулла
2021 йил 28 февраль
![](https://s2.save4k.ru/pic/O9A1hFBaDWs/maxresdefault.jpg)