محاورة الشاعر مطلق الثبيتي والشاعر شليويح بن شلاح - رحمهم الله .


مطلق الثبيتي
لحالي في طواريف القصيم وفي حلال مطير
والا يالله بصف ٍ من شبابه يشرح البالي
شليويح المطيري مع جنوبه شفت شر وخير
وشال الخير عن عمي وحط الشر مع خالي

شليويح بن شلاح
مرادك عنصره ولا تبا تدهن جنوب السير
تفرق فالعرب وانته من اول عندهم غالي
شليويح المطيري لو قسم لك من جناح الطير
تبا تحكم على العربان وانت بحكمة الوالي

مطلق الثبيتي
لقيتك تدفع العربان يالمدفاع ابو جنزير
تباهم ينزلون بطرشهم يم الخلا الخالي
أنا خابرك رجل ٍ يعرف الفضه من القصدير
حصل فيكم خلل يا اهل السهل والا يورالي

شليويح بن شلاح
حديثك يالبخاري عند ربعك مايبا تدبير
لكن ارسالتك يلعب بها عشرين مرسالي
ترى راع المخطط عارف الاكوات والتمتير
وحنا بالسهل ونبدّل المنزل بمنزالي

مطلق الثبيتي
أنا شاره عليك وشرهة الشاعر حمول بعير
ليا أوحيتك تغني تطري الشرهه على بالي
تضيرها وتحلبها ولا تمسح جنوب الضير
وخضيت السقا وقت الشقا من درها الحالي

شليويح بن شلاح
أنا ماني مريض تقرب الجراح والتخدير
أنا دكتورها حلالها للعقد حلالي
بعد صريتها بالكيس حنطه جيتني بشعير
لكنك لا تخلي دلونا يصفق على الجالي

مطلق الثبيتي
وفيك أم الكباير مالها راي ٍ ولا تدبير
ولكن البلا من ولدها شيال الاثقالي
ويا ليتك تنزل قشنا من فوق ظهر العير
وابشري لك جمل وتروح تبرا كل جمالي

شليويح بن شلاح
بعد ما زفلت الشارع تبا الترصيف والتشجير
تبا تلعب على كيفك وتصرف كل الاموالي
زهابك فوق ظهر حصان يمسي بك جبال النير
ليا منك شربت المر تعرف تشرب الحالي

مطلق الثبيتي
ابعمرها ليا ربي عمرها والجمال تسير
وانوخها واحملها على حشمه وتشتالي
انا خابرك لو حسيت بالغيره عليه تغير
لو انه ماعطاك من الدلال الصبح فنجالي

شليويح بن شلاح
الا ياطير ودك بالمطير ولا قويت تطير
بعد طلعت عليك الشمس عشك مابه ظلالي
ترى شقرا ليا ميزتها تقرب شعيب سدير
تبا ودك تبعدها وانا عديت الاميالي

مطلق الثبيتي
تريح جوف قريه وازرع البرسيم والجرجير
وعذر فالرياض ولا تعرض بعض الاحوالي
لك الله ياشليويح المطيري لاخبر ابن شقير
يردك للكويت وله عن الرجال رجالي

شليويح بن شلاح
زرعنا ثم حصدنا من زراعة فوق جال البير
انا ماني سواتك عيشتك من كل فوالي
انا صالح وفالح والفلاحه كلها تقدير
يبدل واحد ٍ وسط البلد ماهو بشغالي

مطلق الثبيتي
ترى من يصحب عيال النصارى ياكل الخنزير
وانا داري عن الخنزير ماله قلب وطحالي
فتحنا الصوره اللي جاتنا من غرفة التصوير
وحطينا على مثناتها قوسين وهلالي

свернуть