Կառավարության շենքի դիմաց այսօր շտապ օգնության մեքենա էր կանգնած. պատճառը հաշմանդամություն ունեցող օդաչուներից մեկի ինքնազգացողության վատացումն էր։ Վանիկ Մալյանը, ինչպես նաեւ մյուս օդաչուները, պահանջում են իրենց թոշակները, որ արդեն 8 տարի չեն ստանում։ Վարչապետ Հովիկ Աբրահամյանը խոստացել էր, որ մինչեւ մարտ ամիսը նրանց խնդիրը կլուծվի, սակայն մինչ այժմ ոչ մի քայլ չի արվել այդ ուղղությամբ։ Օդաչուները վարչապետին հորդորում են կատարել իր տղամարդու խոսքը։
Հաշմանդամ օդաչուները պատրաստվում են իրենց ակցիաները դարձնել ամենօրյա։
Այսօր կառավարության շենքի մոտ էին նաեւ «Տոնուս» ընկերությունից տուժած քաղաքացիները. նրանք դեռ 2006 թ. պայմանագիր են կնքել ընկերության հետ՝ բնակարան ստանալու համար։ Գումարները մուծել են Արցախբանկում, իսկ «Տոնուս» ընկերության սննկացումից հետո բնակարանները դարձել են բանկի սեփականությունը։ Արդյունքում 180 ընտանիք մնացել է առանց բնակարանի։ Նրանք այլեւս չեն էլ պատկերացնում, թե ինչպես է լուծվելու այս հարցը։ Կառավարությունից նրանց էլ որեւէ մեկը չի արձագանքել։
