Մի օր քեզ թիկունքից կհարվածեն հենց նրանք, ում կրծքով ես պաշտպանել, ու թեև հարվածը թիկունքից է լինելու, միևնույնն է, այն ուղիղ սրտիդ է կպնելու:
Մի օր քեզ ուրանալու են մի լուցկու համար որի տված լույսը ընդամենը կես րոպե է տևելու, և հրաժարվելու են քո տևական լույսից, ինչպես որ հավերժությունից են հրաժարվում ներկայի կարճաժամկետ հաճույքի համար:
Մի օր քեզ վաճառելու են կես արծաթով, դավաճանելու են կես խոսքից, մոռանալու են օրվա կեսից ու կես բաժակից...
Մի օր հասկանալու ես, որ քանի դեռ պետք էիր, քեզ աչքի տակ էին պահում, որպես պահեստային ու հարմար տարբերակ, իսկ երբ դադարեցիր պետք լինել, քեզ պահելն ավելորդ համարեցին, ինչպես կովին, որ երբ էլ կաթ չի տալիս մորթում են... Մի օր հասկանալու ես, որ քո համար աշխարհի ամենաթանկ բանը դա ժամանակը չէ, այլ արցունքները, հասկանալու ես, որ եթե կյանքի ինչ-ինչ հատվածում տարբեր առիթներով ժամանակդ նվիրել ես արժանի ու անարժան մարդկանց, ապա արցունքներդ պիտի նվիրես բացառապես արժանիներին, թեև արժանին երբեք չի թողնի աչքերդ թրջես...
Մի օր հասկանալու ես, որ չսիրվելուց շատ ավելի սարսափելի է, սիրո մեջ օգտագործվելն ու սիրուց փորձվելը և այդ ժամանակ ընդունելու ես, որ բոլոր տեսակի սերերի մեջ, սերն առ Աստված միակն է, որ քեզ չի ցավեցնի, չի ուրանա ու չի լքի, այլ օր օրի կօրհնի ու կապրեցնի:
Մի օր հասկանալու ես, որ քեզ տեսնում ու լսում են, բայց չեն հասկանում, որովհետև հասկանալու համար զգալ է պետք:
Հասկանալու ես, որ քեզ ուշադիր կարդալու են ոչ թե հասկանալու, այլ բացթողումներդ ու տառասխալդ ուղղելու համար, մինչ դեռ կարևոր բացթողմները կյանքումդ էին... Մի օր հասկանալու ես, որ ժամանակից շուտ ես մեծացել ու շատ բան ես հասկանում, բայց միևնույնն է մեծության ու հասկացողության հետ մեկ տեղ, շարունակելու ես սայթակել, մարդկանց ընտրության հարցում` անընդհատ սխալվել, ժամանակից շուտ ու շատ վստահել ու նվիրվել, հոգուդ մեջ տեղ տալուց` շտապել...
Մի օր հասկանալու ես, որ այս ամենի գիտակցումը քեզ այնքան չի ցավեցնելու, որքան խաբված ու օգտագործված լինելու զգացումը և այդ օրը միակ միտքը որ քեզ կմխիթարի, կյանքիդ համար կարգախոս կդառնա. «Երբ ինչ որ մեկի համար քեզ կուրանան, չնեղվե´ս, կգա ժամանակը, որ նրան էլ կուրանան մեկ ուրիշի համար, կամ հենց նա կուրանա ում համար քեզ ուրացան, չէ որ կյանքը բումերանգ է, իսկ Աստված ամենատես»... Լիլի Շակրին «Հաղթանակները ցավից են ծնվում»


Instagram - Ruya.Sl
TikTok - Ruya.Sll

свернуть