高雄民謠【鹽埕區長(全) -郭萬枝】 (萬枝調)
作曲 郭萬枝 作詞 楊東敏
編曲 江東泉 修詞 吳夏暉
1、鹽埕區長郭萬枝，人人叫伊郭先生；做人慷慨佮有義，哎喲，欲交朋友著揣伊。
2、鴛鴦水鴨雙雙對，愛人比某有較媠；若欲相好喙拄喙，哎喲，袂凍結局上克虧。
3、一隻田嬰四支翼，阿君做人愛老實；毋通僥阮揣別人，哎喲，害阮規暝守空房。
4、二條菜瓜生相倚，大先出生有較大；愛人無愛咱著煞，哎喲，毋通出手甲人膏。
5、聽人咧講高雄好，欲好第一是愛河；咱若欲好去𨑨迌，哎喲，我的阿君好毋好。
6、一條手巾烏貓紗，欲送阿君少年家；阿君真久無來揣，哎喲，咁是僥阮揣別个。
7、人人叫伊林先生，厝裡有錢佮有妻；看阮生媠有佮意，哎喲，想欲娶阮做細姨。
8、天頂落雨霆雷公，溪底無水魚𠢕傱(gâu-tsông)；阿君愛娘毋敢講，哎喲，親像痟狗亂亂創。
9、半爿山頂有一空，內面一空烏弄弄；伸手欲摸無半項，哎喲，咁是彼路仙洞空。
10、竹筍落塗目目柯，移山倒海樊梨花；阿君愛娘著來娶，哎喲，毋通放阮踮煙花。
11、鐵釘落塗會生鉎，甲箬落水會捲蔫(lian)；看有食無干焦癮，哎喲，親像佛祖鼻香煙(hiunn-ian)。
12、人的阿君坐汽車，阮的阿君著用行；若欲好命著拍拼，哎喲，毋免一生過歹命。
13、較早咧好帥仕相，即馬咧歹君僥娘；望君正行倒退想，哎喲，想起較早君愛娘。
14、這位兄台真標緻，予阮看著真佮意；in厝是無有妻兒，哎喲，想欲問伊驚嫌疑。
15、一尾鱸鰻蟯蟯趖(ngia̍uh-ngia̍uh-sô)，趖入洞內欲𨑨迌；等¬待鰻𣻸(siûnn)甪(lut)清楚，哎喲，趖出洞口軟荍荍(nńg-siô-si¬ô)。
16、有人講你真亂來，看著查某你著愛；這款查埔阮無愛，哎喲，毋通跤手亂亂來。
17、深山林內一條溝，溝中一粒紅石頭；千軍萬馬袂得到，哎喲，只驚一粒和尚頭。
18、一區水田毋播稻，留欲發草飼鰗鰡；鰗鰡飼大真利害，哎喲，半壁一空伊也知。
19、第一可憐阮一人，親像監獄關犯人；犯人關久也會放，哎喲，阮來可憐一世人。
20、一條手巾繡花草，無某阿君毋通交；等待某緣若是到，哎喲，斬草斷根無回頭。
21、二條手巾繡花欉，薄情阿君採花蜂；交著新的舊來放，哎喲，迎新棄舊毋是人。
22、三條手巾繡龍蝦，無情阿君少年家；僥雄的人無好尾，哎喲，毋通落人喙唇皮。
23、四條手巾繡金魚，阿君欲僥阮無疑；想起早情好情意，哎喲，初戀散步行港邊。
24、五條手巾繡海岸，無情阿君毋通戀；一時欲僥情變款，哎喲，害阮心慒帶操煩。
25、六條手巾繡花鳥，無疑阿君你來僥；滿腹苦情講袂了，哎喲，心頭怨氣怎會消。
26、坐著火車欲轉去，一點五分到嘉義；咱無緣份來相見，哎喲，望君毋通暗傷悲。

свернуть