Акафист святой мученице царице Александре Римской
Память: 06 мая (23 апреля ст. ст.)
[ Ссылка ]
__
Мученице Александре, царице Римской

Тропарь, глас 4:

Ца́рства земна́го сла́ву презре́вши,/ Еди́наго Христа́, нас ра́ди распя́таго, возлюби́ла еси́/ и, Того́ му́жественне испове́дающи,/ венце́м му́ченическим увенча́лася еси́,/ всеблаже́нная цари́це Алекса́ндро./ Те́мже и ны́не Престо́лу Царя́ сла́вы на Небесе́х предстоя́щи,// моли́ся о спасе́нии душ на́ших.

Кондак, глас 2:

Храм Твой всечестны́й,/ я́ко цельбу́ душе́вную обре́тше вси ве́рнии,/ велегла́сно вопие́м ти,/ му́ченице Алекса́ндро, великоимени́тая:// Христа́ Бо́га моли́ непреста́нно о всех нас.

Величание

Велича́ем тя,/ страстоте́рпица Христо́ва Алекса́ндро,/ и чтим честно́е страда́ние твое́,/ я́же за Христа́// претерпе́ла еси́.

Молитва

Це́ркве Святы́я украше́ние и му́чениц сла́во, пресла́вная цари́це Алекса́ндро! К тебе́ во умиле́нии серде́ц на́ших припа́даем и твоего́ заступле́ния у Го́спода о нас мо́лим. Аще бо чистоте́ твое́й не поревнова́хом и безбоя́зненнаго испове́дания твоего́ не приобщи́хомся, па́че же мно́гими прегреше́ньми и лю́тыми паде́ньми и отсту́пствы гнев Бо́жий привлеко́хом, но не хо́щем во гресе́х на́ших умре́ти, и на твой по́двиг взира́юще, па́ки на одоле́ние страсте́й на́ших ополча́емся. Сие́ же ве́дуще, я́ко кроме́ благода́тныя по́мощи ничто́же благо́е сотвори́ти возмо́жем, ту́ю по́мощь нам от Го́спода пода́ти тя про́сим. Ты бо, страстоте́рпице свята́я, ве́лие ко Влады́це дерзнове́ние стяжа́ла еси́, я́ко просла́вившая Его́ в чистоте́ души́ твоея́ и в телеси́ твое́м страда́льчестем, отрекла́ся еси́ сла́вы и че́сти ми́ра сего́, возлюби́вши бога́тство и похвалу́ Христо́вы. Те́мже от того́ бога́тства и на́шей нищете́ духо́вная пода́ждь дарова́ния, и от безме́рных прегреше́ний жизнь на́шу соблюди́, мир и безмяте́жие нам испроси́, от ну́жды и уны́ния нас предста́тельством Твои́м огради́, друг ко дру́гу нас в послуша́нии и братолю́бии наста́ви и ко Го́споду Очи серде́ц на́ших всегда́ возводи́, во е́же сла́вити нам Отца́, и Сы́на, и Свята́го Ду́ха держа́ву, и твое́ те́плое предста́тельство, во ве́ки веко́в. Ами́нь.
__
Мученице Валерии, царице Римской

Тропарь, глас 4:

А́гница Твоя́, Иису́се, Вале́рия, зове́т ве́лиим гла́сом: Тебе́, Женише́ мой, люблю́, и Тебе́ и́щущи, страда́льчествую и сраспина́юся и спогреба́юся Креще́нию Твое́му и стражду́ Тебе́ ра́ди, я́ко да ца́рствую в Тебе́ и умира́ю за Тя, да и живу́ с Тобо́ю; но я́ко же́ртву непоро́чную приими́ мя, с любо́вию поже́ршуюся Тебе́. Тоя́ моли́твами, я́ко Ми́лостив, спаси́ ду́ши на́ша.

Кондак, глас 2:

Храм Твой всечестны́й, я́ко цельбу́ душе́вную обре́тше, вси ве́рнии велегла́сно вопие́м ти: де́во му́ченице Вале́рие великоимени́тая, Христа́ Бо́га моли́ непреста́нно о всех нас.

Величание

Велича́ем тя,/ страстоте́рпица Христо́ва Вале́рие,/ и чтим честно́е страда́ние твое́,/ я́же за Христа́// претерпе́ла еси́.

свернуть