● გვესტუმრეთ: [ Ссылка ]
● შემოგვიერთდით: [ Ссылка ]
მსახიობი ქეთევან კიკნაძე 2024 წლის 9 ივლისს, 85 წლის ასაკში გარდაიცვალა. ტელეკომპანია PKTV-მა მოამზადა მისი გახსენების სიუჟეტი.
2024 წლის 9 ივლისი
მეხივით გავარდა - გარდაიცვალა ქეთევან კიკნაძე!
გულში ჩამწყდა, რაღაც ძალიან მძიმედ უსაშველო... არ ვიჯერებდი, ალბათ რაღაც უცნაური ხუმრობაა მეთქი, ასე მინდოდა, მეფიქრა, მაგრამ...
რეალობა აღმოჩნდა...
როგორ მინდა ყველაფერი ქრონოლოგიური თანმიმდევრობით გავიხსენო, მიჭირს, თითქოს აღარც სიტყვები მყოფნის, წერის თავიც არ მაქვს...
დავიწყებ იმით რომ, ქალბატონი ქეთევანი პირველად 2016 წლის ოქტომბერში გავიცანი, ტელეკომპანია PKTV ახალი გასული იყო მაშინ სიხშირეზე.
შინ ვესტუმრეთ უდიდეს ქალბატონს - სოლოლაკში.
რა უნდა გითხრათ ახალიო, თან შეწუხდა, - ყველაფერი უკვე ნათქვამი მაქვსო... - გავუღიმე, ვიპოვით ახალს, ან ახლებურად ვიტყვით მეთქი...
იმთავითვე დადებითად განეწყო...
ახალი სათქმელი ბევრი მოვძებნეთ, ინტერვიუს დროს ცოტა წაიტირა კიდეც, მაგრამ - ბევრი გამიღიმა...
მიყვარს ის დღე და მართლაც მთელი სული და გული ჩავდე გადაცემის მონტაჟისას...
მოეწონა. დამირეკა. მერე, მომწერა და პატარა გოგოსავით ბედნიერი ვიყავი, თითქოს დებიუტი იყოო ჩემი, ჟურნალისტიკაში...
არადა, უძლიერეს მსახიობთან, დიდ შემოქმედთან, ხელოვანთან, ჩემს ლამაზ ქალბატონთან „დებიუტი“ გამომივიდა...
მომიწონა...
ცოტა მის პოეზიაზეც ვისაუბრეთ...
მერე, რამდენიმე გადაცემაში მოვიწვიე კიდეც ჩემს საავტორო რუბრიკაში და ვსაუბრობდით ტელე- კინო და თეატრზე.
3 ასეთი გადაცემა ჩავწერეთ მხოლოდ: „დათა თუთაშხიაზე“, „წიგნი ფიცისა“-ზე, „შეხვედრა წარსულთან“-ზე...
მერე პანდემია დაიწყო...
მერე???
ქალბატონმა ქეთევანმა მთელი შემოქმედება - საკუთარი, ბატონი გიგა ლორთქიფანიძის, ნინო და ნანა ლორთქიფანიძეების ფილმები, სპექტაკლები, დოკუმენტალისტიკა, სიუჟეტები და ა.შ. - უსასყიდლოდ გადმომცა ჩემი ტელევიზიისთვის - ასე გაიზარდა PKTV. ასევე დისკებითა და ვიდეოკასეტებით გადმომცა უნიკალური ნაწარმოებები ( თავისი პირადი არქივიდან, სხვა ხელოვანებისაც).
დიახ, ტელეკომპანია PKTV-ს დარჩა სამახსოვროდ ყველაფერი ეს. - ქეთევან კიკნაძისგან! ამიტომ მათ უფრო ხშირად გავუშვებ, ვიდრე აქამდე ვუშვებდი!
ქეთევან კიკნაძე ბოლომდე ჩემი ტელემაყურებელი გახლდათ.
სულ ბოლოს რამდენიმე ხნის წინათ ვესაუბრე. ევგენი მიქელაძეზე უნდა ჩაგვეწერა გადაცემა, მისივე თხოვნით. სამწუხაროდ, შევაყოვნეთ გადაცემის ჩაწერა, ცოტა შეუძლოდ გრძნობდა თავს...
2017 წელს მისი ვარსკვლავი გაიხსნა მარჯანიშვილის თეატრის წინ - დამპატიჟა. გადავიღეთ სრულად საღამო. ცოტას წავიტრაბახებ: პატარა წვლილი ჩემიცაა მისი ვარსკვლავის გახსნაში...
მერე იყო და, ქუთაისში, სარაჯიშვილის 49-ში, ბატონი გიგა ლორთქიფანიძის სახლ-მუზეუმის გახსნაზე ვირბინე. ამის ვიდეოსიუჟეტებიც მაქვს შემონახული. მემორიალურ დაფას მივაღწიეთ, მაგრამ დანარჩენი???? - კულტურის სამინისტრომ, ხელისუფლებამ უნდა ინებოს კეთილი და სახლ-მუზეუმად უნდა აქციოს ის სახლი, რომელიც ლორთქიფანიძეებისა და მიქელაძეების საკუთრება იყო.
ქალბატონი ქეთევანი ბევრს იბრძოდა ამის თაობაზე - გულდაწყვეტილი წავიდა...
ახლა მაინც მიეხედოს და დადებითად გადაწყდეს ეს საკითხი, მოისვენებს ქ-ნი ქეთევან კიკნაძის სული...
ჩემს სატელევიზიო და პირად არქივში უამრავი მასალა მაქვს, ქალბატონ ქეთევანსა და ბატონ გიგა ლორთქიფანიძეზე - მადლობა მათ ამისთვის!
მე მაქვს, ექსკლუზიური უფლებით - გიგა და მარიკა ლორთქიფანიძეების მოსკოვში ვიზიტის ამსახველი დოკუმენტური ვიდეოკადრები (1991 წ.), რომელიც ქართულ თეატრსა და ქართულ ხელოვნებას ეხება; ასევე ფილმები: ღამის ზარები“, „წიგნი ფიცისა“, „დათა თუთაშხია „ და როგორც ზემოთ აღვნიშნე, ყველა მათი შემოქმედება - ფირებისა და დისკების სახით.
ქეთევან კიკნაძე არა უბრალოდ ჩემი რესპონდენტი იყო, იგი უცნაურად ზრუნავდა ჩემზე, საოცარი ყურადღებიანი, თბილი და ცოტა მკაცრიც კი იყო...
ყველაფერი მომწონდა მისი შესრულებით, თუმცა გამორჩეულად მაინც ფილმი „პრემიერა“ მიყვარდა, რატომღაც...
ასევე მისი ქეთევან დედოფალი...
მისი ბეჩუნი...
არა, აღარ ჩამოვთვლი, რადგან ყველა მისი გმირი მიყვარდა...
ყველგან ულამაზესი იყო...
ცოვრებაში კი - ულამაზესი, კვადრატში...
8 ივლისს ჩემი და ჩემი მეუღლის დაბადების დღე იყო...
მეორე დღეს, ჩემი ქეთევან კიკნაძე გარდაიცვალა...
არადა, 9 ივლისი - ჩემი მეორედ დაბადების თარიღია (ასე მოხდა 1997 წელს, როცა სასწაულებრივად გადავრჩი!)...
არ იშურებდა ყურადღებას და სითბოს ჩემს, როგორც პიროვნებასა და ჩემს, როგორც ჟურნალისტისა და ტელეწამყვანის მიმართ... მადლობა უკვე ზეციურში გადაბრძანებულს, ამისთვის...
ენდობოდა ჩემს ექიმ მეუღლეს ზაქარია როჭიკაშვილს, სჯეროდა მისი, როგორც მედიკოსის...
წავიდა თავის გიგასთან, რომელიც მარადისობის მასპინძელი იქნება თავისი სიყვარულისთვის! ნათელი და სანთელი მათ სულებს, ამინ
ჰო, რეალობა სამწუხაროა - ქართული თეატრისა და კინოს მსახიობი, საქართველოს სახალხო არტისტი, შოთა რუსთაველის სახელობის პრემიის ლაურეატი ქეთევან კიკნაძე გარდაიცვალა.
ვწუხვარ და თანავუგრძნობ ოჯახს, ახლობლებს, მარჯანიშვილის თეატრს, რუსთავის გიგა ლორთქიფანიძის სახელობის დრამატულ თეატრს, თეატრალურ სამყაროს, კოლეგებს და საქართველოს.
უფალმა დაუმკვიდროს ცათა სასუფეველი!
ტელეკომპანია PKTV-ის და ზაქარია როჭიკაშვილის გასტროენტეროლოგიური კლინიკა „ესკულაპის“ სახელით
ვუსამძიმრებთ საქართველოს!
● © PK TV მაუწყებლობა და მედია ᴴᴰ ● #PKTV
●
Ещё видео!