2016-cı ildə Korrupsiyaya Qarşı Mübarizə Baş İdarəsi tərəfindən vətəndaşların 9360 müraciətinə baxılıb. Bu, 2015-ci illə müqayisədə azdır. Belə ki, həmin il 10634 müraciət daxil olub.
Korrupsiyaya Qarşı Mübarizə Baş İdarəsinin rəisi Kamran Əliyev keçirdiyi mətbuat konfransında Bildirib ki, 2016-cı ildə qurum tərəfindən 251 cinayət xarakterli material araşdırılıb, onlardan 159-u üzrə cinayət işi başlanıb. Digər müraciətlər üzrə isə müvafiq prokuror təsir aktları tətbiq edilməklə inzibati və intizam tədbirləri görülüb.
Kamran Əliyevin sözlərinə görə, ötən il ərzində keçirilən 6 əməliyyat tədbiri nəticəsində korrupsiya cinayəti törədən 6 şəxs cinayət başında yaxalanıb, habelə Baş İdarənin əməliyyat qurumları tərəfindən aparılan araşdırmalar üzrə fakta görə 32 cinayət işi başlanıb, əməliyyat-axtarış tədbirləri nəticəsində axtarışda olan 24 şəxs tutulub.
Baş İdarə rəisinin sözlərinə görə, qurum korrupsiya halları ilə bağlı digər dövlət qurumları ilə də əməkdaşlıq edir. Ötən il Baş İdarəyə Dövlət Təhlükəsizliyi Xidmətindən 14, Prezident Administrasiyasından 1, Fövqəladə Hallar Nazirliyindən 16, Daxili İşlər Nazirliyindən 15, Vergilər Nazirliyindən 48, Baş Prokurorluqdan 5, Gömrük Komitəsindən 3, Dövlət Sərhəd Xidmətindən 4, Maliyyə Bazarlarına Nəzarət Palatasından 4, Dövlət İmtahan Mərkəzindən 5, Dövlət Neft Şirkətindən 6 müraciət daxil olub.

свернуть