Tarix muzeyində Şah İsmayılın dövlət quruculuğu və hərbi fəaliyyətinə həsr olunmuş sərgi ilk dəfə keçirilir. Burada Azərbaycan tarixininin görkəmli siması, böyük sərkərdə və hökmdar, Səfəvilər dövlətinin banisi I Şah İsmayıl Xətainin həyatı, dövlət quruculuğu və hərbi fəaliyyəti nümayiş olunur.
SƏBUHİ ƏHMƏDOV - MUZEYİN ŞÖBƏ MÜDİRİ, TARİX ÜZRƏ FƏLSƏFƏ DOKTORU:
"Biz çalışdıq Şah İsmayılı mütləq bir sərkərdə bir döyüşçü və dövlət başçısı kimi göstərək. Şair kimi məlumdur, çar kimi onun qəzəlləri poemaları tanınır, amma bir sərkərdə kimi, dövlət xadimi kimi göstərmək çətin idi. , amma buna nail olduq. Dünyanınm müxtəlif müzeyləriylə əlaqəmiz oldu. Bir çox dünya muzeylərində Şah İsmayıl Xətaiyə və Səfəvi dövlətinə aid materillar var. Onlardan foto kopiyalar götürüldü, bəzilərinin burada mulyajları düzəldildi".
Muzeyin apardığı elmi toplama işi sayəsində Səfəvilər dövlətinin ilk dövrlərinə aid unikal eksponatlar toplanıb. Muzeyin bərpa laboratoriyasında aparılan uzunmüddətli iş sayəsində XVI-XVII əsrlərdən dövrümüzə qədər gəlib çatmış eksponatlar təmizlənib, konservasiya olunub, zədələnmiş eksponatlar bərpa edilib.
Sərgidə 130-a yaxın eksponat tamaşaçıların diqqətinə təqdim olunub. Onların əksəriyyəti ilk dəfədir nümayiş olunur. Eksponatlar arasında silahlar, pullar, kaşılar, parçalar, Şah İsmayılın “küla-xud” dəbilqəsi, halqalı zireh, polad və dəri qalxanlar, üzü qoruyan halqalı maska, qılınc, xəncər, döyüş baltası da var.
AKİF ƏLİZADƏ AMEA PREZİDENTİ: "Şah İsmayıl Xətai Səfəvilər dövlətinə aid olan bu sərgi Azərbaycan tarixinə qızıl hərflərdə yazılmış böyük bir tarixdir və ümumiyyətlə Şah İsmayıl Xətainin siması, onun dövlərt xadimliyi olmağı, onun sərkərdə kimi dünyada məşhur olmağı onu istedadlı bir insan kimi dövlətə rəhbərlik etməyi böyük maraq yaradır və hər halda o tarixə insan bir daha qayıdaraq valeh olur ki, nə böyük gözəl Azərbaycan İmperiyası XVI əsrdə yaranmış idi".
Şah İsmayıl Xətai rəhbərlik etdiyi dövrdə ilk dəfə türk dilini rəsmi dövlət dili edib, şair olaraq ilk dəfə türk dilində heca vəznində şeir yazıb, ilk dəfə güləşi döşək üzərinə gətirən pəhləvan olub.
Sərgi I Şah İsmayıl Xətainin həyat və fəaliyyətini əyani sürətdə nümayiş etdirir. Sərgi dekabrın 15-dək davam edəcək
![](https://i.ytimg.com/vi/QpbkwA57cAk/mqdefault.jpg)