«Սեպտեմբերի 27-ին Պաշտպանության բանակի թիվ N զորամասի ավագ հրաձիգ-զենիթահար, շարքային Կարեն Արմենի Ալեքսանյանը խոցել է հակառակորդի 3 ԱԹՍ, որով աջակցել է անձնակազմի ժամանակին դուրսբերումը կենտրոնացման շրջաններ: Հաջորդ օրը` սեպտեմբերի 28-ին, շարքային Կարեն Ալեքսանյանը յուրային ստորաբաժանումների կողմից իրականացվող մարտական խնդրի կատարման ժամանակ խոցել է ևս 1 ԱԹՍ»: Հակառակորդի չորս ԱԹՍ խոցած ժամկետային Կարեն Ալեքսանյանի անունը 44-օրյա պատերազմի առաջին օրերի պաշտոնական լրահոսում էր։ «Արիության համար» մեդալն այսօր այդ օրերից մնացած մետաղյա շոշափելի հիշողությունն է, մնացած հիշողությունները մտքում են ու սրտում։
Կարեն Ալեքսանյանը ծնվել է 2000 թվականին Երևա նում։ Մինչ զորակոչվելը սովորել է Հայաստանի ագրարային համալսարանի վարժարանում։ 2019-ի հունվարին զորակոչվել է բանակ, ծառայել է Մուղնիի ուսումնական զորամասում, ապա՝ Արցախի Մարտունի 3 զորամասում, որտեղ էր նաև 44-օրյա պատերազմի ընթացքում։ Զորացրվել է 2021-ի հունվարի 25-ին։ Նույն թվականին էլ ընդունվել է Հայաստանի պոլիտեխնիկական համալսարան։ «Տեղեկատվական տեխնոլոգիաներ» բաժնի երկրորդ կուրսի ուսանող է։ Կարենի նպատակները պարզ են ու մարդկային․ սովորել, աշխատել, լավ ընտանիք կազմել, երեխաներ ունենալ ու շարունակել սերունդը։
