Ամեն տարի ապրիլի 24-ին մարդաշատ է լինում Լեհաստանի Կրակով քաղաքի Սուրբ Միկոլայի եկեղեցու բակը: Կրակովի հայկական համայնքը եւ համայնքի բարեկամներն այստեղ են հավաքվում` հարգանքի տուրք մատուցելու, ծաղկեպսակ եւ ծաղիկներ դնելու 1915 թվականի Հայոց ցեղասպանության անմեղ զոհերի հիշատակին: Երեկ հայկական խաչքարի մոտ կազմակերպված միջոցառմանը ներկա է եղել նաեւ Կրակովի քաղաքապետարանի խորհրդի փոխնախագահ Մարտա Յան-տոսը:

Ապրիլի 24-ին աշխարհի շատ երկրների նման, Լեհաստանի հայ համայնքը եւս հիշում է 1 ու կես միլիոն անմեղ զոհված հայերին, աղոթում նրանց հոգու խաղաղության համար: Ավելի քան 20 տարի լեհահայերը հավաքվում են Կրակովի Սուրբ Միկոլայի եկեղեցու բակում գտնվող հայկական խաչքարի մոտ:

Հայաստանից հեռու հայ համայնքի անդամները ծաղկեպսկաներով ու մոմերով հավաքվում են այս հուշարձանի մոտ: Տասնամյակներ շարունակ դատապարտումի ու սթափության նույն պահանջներն են հնչում: Կրակովի հայկական դպրոցի աշակերտներից շատերը երբեւէ Ծիծեռնակաբերդում չեն եղել: Ապրիլի 24-ին այս խաչքարն է նրանց հավաքատեղին:

Լեհաստանի խորհրդարանը Հայոց Ցեղասպանությունն ընդունել է 2005-ին: Լեհահայ համայնքը արդարության նույն կոչով դիմում է ամբողջ աշխարհին:

свернуть