Salyanda yeni doğulan körpənin dişi görənləri təəccübləndirdi
Salyan rayonunda maraqlı hadisə baş verib. Belə ki, rayon mərkəzi xəstəxanasının doğum şöbəsində yeni doğulan uşaq onu görənlərin marağına səbəb olub. Adətən yeni doğulan körpələrin diş çıxarması üçün aylarla vaxt lazım olur. Amma Salyanda dünyaya gələn körpə bu prosesi elə ana bətnində geridə qoyub. Belə ki, Sabirabad rayonunun Cəngən kənd sakini, 19 yaşlı Nərgiz Əsgərova hamiləlik dövrü olduğundan Salyan Mərkəzi Rayon Xəstəxanasının doğum şöbəsinə gətirilib. İki gün bundan əvvəl xəstəxanaya gətirilən qadın dünyaya qız uşağı gətirib. Çəkisi 2 kiloqram 500 qram olan körpə sağlamdır. Həkimlər tərəfindən yeni doğulan körpə müayinə edilən zaman onun ağzında yalançı diş çıxdığı aşkarlanıb. Həkim Aytəkin Əbilova yeni doğulan körpənin ağzında yalançı dişin çıxmasının uşağın sağlamlığı üçün heç bir təhlükə törətmədiyini bildirdi. Həkimin dediyinə görə, bu xəstəxanada qeydə alınan birinci hadisə deyil. Bir neçə il bundan əvvəl də iki belə yeni doğulan uşağın dişi olub.
