şeir: Nüsrət Kəsəmənli
səs: Xəzər Süleymanlı
piano: Vüsal Namazlı
#xezersuleymanli #xəzərsüleymanlı #nüsrətkəsəmənli
Amandır, qəlbini belə sıxma, gəl,
Bir körpü salmışam, sınmaz, qorxma, gəl,
Sən Allah, üzümə elə baxma gəl,
Özün yıxılıbsan, dur, alagözlüm.
.
Uşaq deyildin ki, yaşı söyəsən,
Naşı günlərini, naşı söyəsən,
Daşa dəymədin ki, daşı söyəsən,
Özün yıxılıbsan, dur, alagözlüm.
.
De, kimlər tərpətdi səni yerindən,
Bundan sonrasını düşün dərindən,
Qəlbimin əlçatmaz zirvələrindən
Özün yıxılıbsan, dur, alagozlüm...
.
Taleyin qədərlə görüşdü sənin,
Gördüyün yuxular qarışdı sənin.
Ayağın düz yerdə sürüşdü sənin,
Özün yıxılıbsan, dur, alagözlüm...
.
Başında tufantək mən əsməmişəm,
Uzaq yol gəlmişəm, tələsməmişəm,
Sənın kəndirini mən kəsməmişəm,
Özün yıxılıbsan, dur, alagözlüm...
.
Gör nələr boylanır gələcəyindən,
Qorx yadların sənə güləcəyindən,
Taleyin çürümüş yelləncəyindən
Özün yıxılıbsan, dur, alagözlüm.
.
Quruyan bulaqlar çağlamaz, axı.
Buludlar yağışı saxlamaz, axı,
Özü yıxılanlar ağlamaz, axı,
Özün yıxılıbsan, dur, alagözlüm...
Ещё видео!