Біріккен Ұлттар Ұйымының қауіпсіздік кеңесі Иранның ядролық бағдарламасына қатысты веналық келісімді мақұлдайтын қарарды қабылдады. Келісім күшіне енген күннен бастап 10 жылдан кейін Тегеранға салынған барлық жазалау шаралары күшін жоятын болады.
Ол үшін тараптар құжатта көрсетілген міндеттемелерін орындауы тиіс.
Айта кетейік, құрамына Ұлыбритания, Ресей, Германия, Қытай, АҚШ және Франция кіретін «алтылық» пен Иран 14 шілдеде Венада ортақ келісімге келген болатын. Соған сәйкес Тегеранның ядролық бағдарламасына шектеулер қойылады.
Егер де Иран ядролық келісімді бұзса, 65 күн ішінде санкциялар қайта салынады.
Айта кетейік, біздің еліміз Иранның ядролық бағдарламасын құптайды. Осы мәселе төңірегінде СІМ арнайы мәлімдеме жасады. Бұл аймақтық және халықаралық қауіпсіздікті нығайтуға зор мүмкіндік бермек. Сонымен бірге Иран мен халықаралық қауымдастық арасындағы қарым-қатынасты реттеуге үлес қосады.
Сондай-ақ бүгін Ақтауда ирандық тауар өндірушілердің экономикалық көрмесі өз жұмысын бастап жатыр. Қазіргі таңда Маңғыстау облысы мен Иран арасында өзара тауар айналымы 36 миллион доллар көлемінде. Бұл өкінішке орай аз көрсеткіш.
Иран еліне салынған санкциялар біздің жан-жақты қарым-қатынас орнатуымызға кедергі келтірген болатын. Енді санкциялар өз күшін жойса, екі ел арасындағы сауда-саттық көлемі арта түсетін болады.
![](https://i.ytimg.com/vi/S4lhBtRT1JE/maxresdefault.jpg)