20 маусымда Алматы қаласы Тілдерді дамыту басқармасы Қазақстан Республикасында тілдерді дамыту мен қолданудың 2011-2020 жылдарға арналған мемлекеттік бағдарламасын іске асыру жөніндегі Алматы қаласының 2017-2019 жылдарға арналған іс-шаралар жоспарын жүзеге асыру мақсатында және Басқарманың 2017 жылға арналған жұмыс жоспарына сәйкес Баспасөз күніне орай «Мемлекеттік тіл және бұқаралық ақпарат құралдары» қалалық байқауын өткізеді.
Байқаудың мақсаты – мемлекеттік тіл саясатының қазақ және орыс тілді бұқаралық ақпарат құралдарында кеңінен насихатталуын қолдау.
Байқауға тіл саясаты, мемлекеттік тілдің қазіргі ахуалы туралы өткір де өзекті материалдары жарияланған жекелеген журналистер «Баспасөздегі үздік журналист», «Интернет-сайттағы үздік журналист», «Үздік тележурналист», «Үздік радиожурналист» номинациялары бойынша қатысты.
Байқаудың қазылар алқасы құрамына белгілі тілшілер, ғалымдар, үкіметтік емес ұйымдардың өкілдері, аударма ісінің кәсіби білікті оқытушылары енді. Әділқазылар алқасының құрамында «Қамшы» ақпараттық агенттігінің жетекшісі, жоба авторы Біләл Қуаныш, «Қазақстан РТРК» АҚ Басқарма төрағасының кеңесшісі, Қазақстан Журналистер одағы сыйлығының екі мәрте лауреаты Нұртілеу Иманғали, «Алматы ақшамы» газетінің тілшісі Нұржамал Байсақал болды.
Білікті мамандардан құрылған қазылар алқасы байқауға жіберілген материалдарды жан-жақты қарап, талдап, талқылай отырып, ашық дауыс беру арқылы номинациялар бойынша жеңімпаз бен жүлдегерлерді анықтады. Байқауды қорытындылай келе, «Баспасөздегі үздік журналист» номинациясы бойынша І орынды «Айқын» республикалық қоғамдық-саяси газетінің шолушысы Төреғали Тәшен иеленсе, «Үздік тележурналист» номинациясы бойынша І орынды «Қазақстан» арнасының сценаристі Назым Перне иеленді. «Үздік радиожурналист» номинациясы бойынша жүлделі І орынды «Қазақ радиосы» Алматы студиясының жетекшісі Құтпанбаев Бақыт иеленсе, ал «Интернет-сайттағы үздік журналист» номинациясы бойынша І орынға «Қамшы кз» сайтының тілшісі Нұртай Нұрғали ие болды.
Әр номинация бойынша жүлделі бірінші, екінші және үшінші орындарды иеленгендерге тиісті дәрежедегі дипломдар мен бағалы сыйлықтар тапсырылды. Қатысушыларға алғыс хаттар мен естелік сыйлықтар берілді.
![](https://i.ytimg.com/vi/SNHQfpho-bw/maxresdefault.jpg)