Khrihfa bu tuai le hruaitu luban a tlai mi hna an dirhmun cuh le doh a tthat lonak kong Judas cakuat in Khrihfa bu chungah kan i ralrin ding mi le kan hrial hrimhrim ding mi thil pathum a chimnak thawngtha bia a si. A ngai mi caah hlawknak a um hrimhrim lai tiah kan zumh.
Nihin ah Laimi nih kan i fawih taktak mi pakhat cu Khrihfa bu duh paoh in tuaitaam le tuah hi a si ti cu al awk ttha loin kan boruak nih a langhter ko.
Khrihfa bu hi Sunday School cawnpiaktu kan si zongah, mino upa pawl kan si zongah, nubu upa pawl kan si zongah, Deacon kan si zongah mah duh ning in thil tuah le mi duhnak kalh khawh lawng kan i zuam ttheo tawn. Kan thiltuah mi hi Bible ning a si lo zongah, upa kan ttuan khawhnak a si ahcun, kan bia ning in thil a kal khawhnak a si ahcun zei paoh tuah kan ngamh dih.
Khrihfa bu tuaitaam hi kan tak a sum lo. A ruang bik cem cu kan tuah ruangah kan in ding mi hmailei kong kan theih lo caah a si. Kanmah diriamhnak ding in kan hman khawhnak ding a si ahcun, kanmah kan langh khawh ding le upa kan ttuan khawhnak ding a si ahcun kan sual len le kan tthat lo len zongah kan pah chih ngam dih ko. Kan cal a cang tuk i, ningzah zong kan thei lem lo. Cu tluk cun Khrihfa bu kong hi kan fiang kho lo.
Pastor kan si zongah biatak kan dirpi lo. Kan pianthar lo zongah kan ttuan ko. Cawnpiaknak hmaan lo zong kan kalpi ngam ko. Nu ah, tangka le din ei ah kan tluk zongah kan ttuan chih ngam ko. Kan nun le kan tuanbia aa dawh lo zongah kan ttuan chih ngam tthiamtthiam ko. Khrihfa bu tuaitam le hruaitu upa le Pastor dirhmun va cuh te hna hi a ttha lo taktak. Kan tuhmi sualnak le tthat lonak vialte hi kan zuun zungzal. A poi lo kan timi sual hmete ah kan ruahmi zong pakhat hmanh an tlau lo, kan sin ah an rak kir tthan dih. Ralrin thiam hi fim a si.
![](https://s2.save4k.ru/pic/TVQfSmq8my8/maxresdefault.jpg)