ITEGEKO RY'IMANA RIHEREKEZWA N'UMUGISHA W'IMANA
Intang 12:1-2
“Uwiteka ategeka Aburamu ati “Va mu gihugu cyanyu, usige umuryango wanyu n'inzu ya so, ujye mu gihugu nzakwereka. Nzaguhindura ubwoko bukomeye, nzaguha umugisha, nzogeza izina ryawe, uzabe umugisha.”
Gusiga byose mu mitima yacu tukiyegurira Umwami Yesu, ni wo muhamagaro wacu twese muri Kristo. Ariko gusiga byose byo mu bifatika nk'imirimo twakoraga, ntabwo ari umuhamagaro wa buri wese. Icyakora hari abanga umuhamagaro w'Imana, ariko hari n'abo umwanzi ashobora kuriganya bakajya mu muhamagaro utari uwabo cg se igihe kitageze. Iyo uriganijwe n'umwanzi uhura n'ibibazo bitari ngombwa bikarangira utera imbuto z'abantu b'Imana ugatukisha izina ryayo, kuko nta mugisha w'Imana uba uri kumwe nawe muri iyo nzira wishyizemo. “kuko iki ari cyo twabategetse tukiri kumwe namwe, ngo umuntu wese wanga gukora ntakarye. Twumvise yuko hariho bamwe bo muri mwe bagenda bica gahunda, batagira icyo bakora ahubwo bakaba ba kazitereyemo. Nuko rero abameze batyo turabategeka tubihanangiririza mu Mwami Yesu Kristo, gukorana ituza ngo babone uko barya ibyokurya byabo ubwabo.” (2Tes 3:10-12). Hariho ababasha kwanga kugira icyo bakora kubw'ubunebwe bakabyita umuhamagaro ariko nta jwi ry'Imana ryavuganye nabo. Bene abo nta mugisha w'Imana ugendana na bo kuko umugisha w'Imana uherekeza abo ihamagaye. Petero n'abandi bigishwa basiga inshundura n'imirimo yabo bagakurikira Yesu, Imana yababeshejeho. Ndetse n'ubwo Yesu yaboherezaga badafite impago cg imvumba, ntacyo bakennye (Lk 22:35). Aburahamu Imana yamutegetse kuva mu gihugu cyabo no gusiga umuryango wabo n'inzu ya se akajya mu gihugu atazi izamwereka, maze imusezeranya ko izamuha umugisha. Byabashaga kugaragara nk'ubusazi ku bandi babonye ataye igihugu cye n'abe akagenda, ariko Imana yari ijyanye na we. Aho yagiye i Kanani, Imana yamuhaye umugisha wo mu bifatika aba umukire cyane mu gihugu cy'ubusuhuke. Abo bose n'abandi, nubwo bakoraga ibigaragara nk'ubupfapfa mu maso y'abantu, ariko babaga bumviye ijwi ry'Imana ryavuganye nabo. Iyo wumviye itegeko ry'Imana, umugisha wayo wo mu buryo bwose ugendana na we. Hari benshi kubwo kutizera no kuyoborwa n'imitekerereze ya kimuntu isanzwe, batemera ko Imana ihamagara umuntu ngo asige byose harimo n'ibyo yaronkagamo ibyo kumubeshaho, bagasa n'aho bumva ko ibyo byari ibyo mu gihe cya kera, ariko Imana dukorera ntihinduka, uko yari iri n'ubu niko iri. Uko yahamagaraga kera n'ubu niko ibasha guhamagara. Icyangombwa ni ukubana nayo, ugahamanya n'Umwuka w'Imana ko uri mu muhamagaro yaguhaye. Iyo bimeze bityo, ubuntu bwayo bugendana nawe, kandi ukanezererwa gukora icyo wahamagariwe. Ibyo ariko ntibikuraho kugeragezwa no mu nzira ikunyuzamo, ariko Umwami aba akuri hafi aguhumuriza kandi akagucira inzira y'ubuntu bwe. Muri iki gihe Imana ikeneye ko abantu bayo baba biteguye iteka gutumwa na yo aho ishaka n'uko ibishaka, ndetse no gukoreshwa nayo nk'uko ibigambiriye mu byo yaduhaye byose. Ibyo bisaba kuyimenya no kumenya ko isi n'ibiyuzuye ari ibyayo kandi ko ari yo ibeshaho byose. Iyo ubimenye ukabyizera by'ukuri, birakorohera kuyumvira iyo ikubwiye kugira icyo usiga cg wigomwa kubw'izina ryayo n'ubwoko bwayo. Hari abanga kumvira Imana bibaza uko bazabaho, ariko Imana ntiyirengagiza abayumvira ahubwo umugisha wayo ubana nabo. “Ubwo bibaye bityo, Imana se yo ntizarengera intore zayo ziyitakira ku manywa na nijoro? Mbese yazirangarana? Ndababwira yuko izazirengera vuba. Ariko Umwana w'umuntu naza, mbese azasanga kwizera kukiri mu isi?” (Lk 18:7-8).
Dusenge: “Mwami Yesu, nyongerera kwizera umpe kumenya ko isi n'ibiyuzuye ari ibyawe, kandi umpe kukumvira mu byo ushaka ko nigomwa byose, mu izina ryawe Yesu, Amen.”
