Ўзбекистон ҳукуматининг расмий портали - gov.uz да муваққат президент Шавкат Мирзиёевнинг виртуал қабулхонаси иш бошлаганидан сал кам бир ой ўтиб, фуқаролардан 20 мингдан зиёд мурожаат келиб тушгани хабар қилинди. Ҳукумат мулозимлари барча шикоятлар кўриб чиқилиши, аниқланган камчиликлар эса бартараф этилишини ваъда қилмоқда.
Ҳукуматнинг виртуал қабулхонасига масъул бўлган мулозим Озодлик билан суҳбатда мурожаатларнинг кўпчилиги Ўзбекистон банкларида нақд пул, қишлоқларда электр энергияси ва газ йўқлиги, автосалонларда эса машиналар олиш мушкулотлари ҳақидаги шикоятлар эканини айтди.
- Вилоятларда электр энергияси ва табиий газда мунтазам узилишлар бўлаётгани, тоза ичимлик суви йўқлиги ҳақида шикоятлар кўп. Шунингдек, банкларда нақд пул йўқлиги ҳақида ҳам кўплаб мурожаатлар бўляпти. Шу билан бирга кўпчилик салонлардан машина олиш қийин, деяпти. Ҳамма шикоятлар бирма-бир ўрганиляпти, - деди исми сир қолишини истаган ҳукумат мулозими.
Шунингдек, ҳукумат виртуал қабулхонасига Тошкент пропискаси, биопаспорт олиш билан боғлиқ мураккабликлар, ички-ишлар органларининг ноқонуний харакатига тааллуқли бўлган минглаб шикоятлар ҳам тушган.
Ўзбекистоннинг расмий ЎзА агентлиги 11 октябрь кунги хабарида Ички ишлар вазирлиги номига уч ярим мингдан кўпроқ мурожаат бўлгани, шуларнинг 40 фоизи прописка, фуқаролик, паспорт масалаларига тааллуқли экани ҳақда хабар қилди.
