Qafqaz Müsəlmanları İdarəsi ilə Dini Komitə arasındakı “soyuq müharibə” nin məzun qurbanları.
Bakı İslam Universiteti 1989-cu ildə qurulub. Rektoru da ölkədə ilk ilahiyyat üzrə alimlik dərəcəsi almış, Şöhrət Ordenli Hacı Sabir Həsənli olub. Universitet Qafqaz Müsəlmanları İdarəsinin nəzdində fəaliyyət göstərib və 2014-cü ildə Təhsil Nazirliyinin dövlət lisenziyasını alıb.
O tarixə qədər 5 illik tam kursu bitirən, ilahiyyatçı, İslamşünas, tərcüməçi, axund – İmam, şəriət müəllimi ixtisasları alan tələbələrə verilən diplomları indi təhsil nazirliyi tanımaqdan və nazirliyin müvafiq diplomu ilə əvəzləməkdən imtina edir. Səbəb kimi də nazirlər kabinetinin qərarını, etirazını göstərir. Lakin araşdırmalardan aydın oldu ki, indiyəcən bu universitetin diplomlarının tanınmasında ciddi problemlər olmayıb.
Sadəcə Dini Qurumlarla iş üzrə Dövlət Komitəsi ilə Qafqaz Müsəlmanları İdarəsi arasında gedən narazılıq, məscid imamlarının təyinat məsələsində və sair mövzularda uzun illərdir gedən çəkişmə axırda ona gətirib ki, Bakı İslam Universitetinin diplomu ilə həmin Komitədə çalışan 6 nəfəri qəfil işdən azad edib, diplomlarının saxta olduğunu bildiriblər.
Nəticədə minlərlə manat təhsil haqqı ödəmiş, 5 il təhsil almış imkansız tələbələr, məzunlar məhkəmələrdə sürünməli olublar.
Hazırda yüzlərlə məzun etiraz edir, yaxın günlərdə kütləvi şəkildə mətbuat konfransı keçirərək ölkə başçısına bu konfliktin qurbanları olaraq müraciət ünvanlamağı düşünürlər.
![](https://s2.save4k.ru/pic/UnZi_noFlGI/maxresdefault.jpg)