Müsavat partiyası iyulun 24-də öz ofisində Gənclər Təşkilatının üzvləri Sirac və Fərəc Kərimli qardaşlarının həbsilə bağlı mətbuat konfransı keçirilib.
Müsavat partiyasının başqanı İsa Qəmbər təşkilat üzvü F.Kərimlinin saxlanmasına münasibət bildirib. “Bu həbs siyasi sifarişdir, növbəti cinayətdir, bir ailəyə qarşı qəddarlıqdır”-deyə partiya başqanı bildirib.
Belə ki, F.Kərimlinin iki gün öncəki həbsindən bir həftə əvvəl qardaşı S.Kərimli həbs olunub. Ona qarşı narkotika satışı, istifadəçisi kimi ittiham irəli sürülüb. Oğlunun həbsindən sonra S.Kərimlinin anası insult keçirib.
F.Kərimli iyulun 22-də anasını xəstəxanaya yerləşdirdiyi zaman naməlum şəxslər onu saxlayaraq qeyri-müəyyən istiqamətdə aparıblar.
“Bu iqtidarın gəncliyə qarşı cinayətidir, gəncləri qorxutmaq, susdurmaq cəhdidir”-deyə Müsavat lideri qeyd edib. Eyni zamanda bu həbs sosial şəbəkələrdə fəal antiiqtidar mövqeyi ortaya qoyan şəxlərə qarşı təzyiq kimi dəyərləndirilib. Mətbuat konfransının gedişində Müsavat partiyasının başqanı İ.Qəmbər partiyanın Tərtər təşkilatının keçmiş sədri Xaqani Məmmədovun da saxlanması haqda xəbər aldığını nəzərə çatdırıb. O, bu həbsləri önləmək üçün təcili addımlar atılması təklifini verib.
“Bu iqtidar ölkədə həqiqəti yazan bir qəzet, sayt, QHT olmasını istəmir, bütün medianın iqtidardan asılı olmasını istəyir, bu iqtidar gerçək müxalifət qüvvələri istəmir, oyuncaq müxalifət istəyir”deyə iqtidarın niyyətini açaraq buna tabe olmayacaqlarını söyləyib.
Vəkil Nemət Kərimli bütün səylərinə baxmayaraq indiyə kimi F.Kərimlinin harada saxlanmasını müəyyən edə bilmədiklərini söyləyib. N.Kərimli F.Kərimlinin həbsini qanunsuzluq, absurd adlandırıb.
S və F.Kərimlilərin atası Raqif Kərimli ailəsinə qarşı bu hücumları ədalətsizlik, siyasi sifariş, gəncləri mübarizə yolundan qorxudaraq geri çəkmək səyi adlandırıb. Amma bunun mümkün olmayacağını bildirib. İctimai-siyasi həyata yeni nəsillərin gəldiyini deyən R.Kərimli bütöv bir nəsli qorxutmağın mümkünsüz olmasını iqtidara xatırladıb.
Daha sonra F.Kərimlinin hüquqlarının müdafiəsilə bağlı Müdafiə komitəsi təsis edilib və Müsavat partiyası gənclər təşklilatının sədri Əhliman Abbaslı komitənini sədri seçilib.

свернуть