Президенти Тоҷикистон Эмомалӣ Раҳмон рӯзи 20 июни соли 2024 ба 35 қонун, аз ҷумла қонуни ҷанҷолбарангези танзими ҷашну маросис ва қонун «Дар бораи масъулият барои таълиму тарбияи кӯдак» имзо гузошт. Қонунҳои имзошуда акнун дар матбуот нашр карда мешаванд ва дар пайи он ба иҷро медароянд
Хадамоти матбуоти президент гуфт: “Қонунҳои Ҷумҳурии Тоҷикистон «Дар бораи танзими ҷашну маросим дар Ҷумҳурии Тоҷикистон» ва «Дар бораи масъулият барои таълиму тарбияи кӯдак» дар таҳрири нав қабул гардида, ба мақсади ҳифзи арзишҳои асили фарҳанги миллӣ, пешгирии хурофоту таассуб, зиёдаравию исрофкорӣ дар баргузории ҷашну маросим, баланд бардоштани маънавиёт ва сатҳи иҷтимоию иқтисодии мардуми Тоҷикистон, инчунин ҳифзи ҳуқуқу озодиҳои кӯдак, таълиму донишомӯзӣ, тарбияи кӯдак дар руҳияи инсондӯстӣ, ифтихори ватандорӣ, эҳтиром ба арзишҳои миллӣ ва умумибашарӣ равона шудаанд. Қонунҳои баимзорасида ба таъмини рушди иҷтимоию иқтисодии кишвар, баланд бардоштани сатҳу сифати зиндагии мардум, таҳкими суботу оромии ҷомеа ва қонунияту тартибот равона шудаанд”.
Ин дар ҳолест, ки тарҳи нави қонуни танзими ҷашну маросим, бахусус бандҳои марбут ба манъи ҳисоб ва манъи идгардак, дар дохил ва беруни Тоҷикистон ба мавҷи вокунишҳо ва норозигиҳо рӯбарӯ шуд ва бисёриҳо умед доштанд, ки президент Эмомалӣ Раҳмон онро имзо нахоҳад кард.
![](https://i.ytimg.com/vi/VwSeIHpBYoU/maxresdefault.jpg)