Батыс Қазақстанда «Жұмыспен қамту-2020» бағдарламасы аясында 900 млн теңге көлемінде арзандатылған несие берілген.
Биыл бұл мақсатқа 1 млрд теңгеден астам қаражат қарастырылып отыр. Ал «Бизнестің жол картасы-2020» бағдарламасы бойынша жыл басынан бері 9 млрд теңгеге бағаланған 79 жоба мақұлданыпты.
«Кәсіп түбі – нәсіп» екенін ауылдағы ағайын түсінгелі қашан. Тек келте жіптің күрмелмей келгені рас. Соңғы жылдары қаржы көздерінің қолжетімді болуы ауыл кәсіпкерлеріне жаңа мүмкіндіктер сыйлады. Бірі мал басын көбейтті, бірі қызмет көрсету саласын қолға алды. Әйтеуір қатардан қалмау үшін қарманып жатқандардың қарасы қалың. Жәнібектік Бәтима Масанова өткен жылы «Жұмыспен қамту-2020» бағдарламасы аясында несие алып, тігін цехын ашыпты. Қазір 9 адамды жұмыспен қамтып отыр. Өнімге сұраныс жеткілікті.
Гүлзада Есенболатова, тігінші:
–Біз осы мемлекеттік бағдарлама арқасында жұмысқа кіріп жатырмыз. Бүгінде жастарға қолдау көп. Сондықтан алғысымыз шексіз.
Бәтима Масанова, кәсіпкер:
– Тендерге қатысып, интернатқа, мектепке арналған төсек жаймаларын тігумен айналыстым. Қазір мәдениет бөлімі көп тапсырыс беріп отыр. Оларға рахмет. Ауылдастардың да қолдауы жеткілікті.
Кәсіпкерліктің қанат жаюына «Бизнестің жол картасы-2020» бағдарламасы да тың серпін беріп келеді. Соңғы 7 жылда өңірде 713 жоба мақұлданып, 57 нысанға қажетті инфрақұрылым тартылған. Биыл да 79 кәсіпкер 900 млн теңгенің субсидиясын алған. Жаңа бизнес бастамаларды қолдауда инновациялық гранттар берілуде. Жыл басынан бері 19 кәсіпкер 47 млн теңгенің қайтарымсыз қаржысына қол жеткізген.
Мейрам Қабдығалиев, БҚО кәсіпкерлік және индустриалды-инновациялық даму басқармасының бас маманы:
–Бұл жерде комиссия құрамымен жобаның жаңашылдығы қаралады немесе жобаның тиімділігіне бақылау жасалады. Яғни жобаның біздің облыста, ауданда бар-жоғы анықталады.
Кәсіпкерліктің түйінді мәселелері әлі де бар. Ол ауыл кәсіпкерлерінде кепілдік мүліктің жоқтығы. Тағы бір өзекті жайт бизнеске арналған жер телімдерінің берілуі. Қазір іскер топ өкілдеріне қолайлы болу үшін бос жерлердің электронды картасы жасақталуда.
Нұрлан Қайыршин, БҚО кәсіпкерлік палатасының директоры:
–Электронды картада қай жердің бизнеске арналғанын, қай жердің мектеп пен үйге арналғанын анықтауға болады. Карта бойынша байқау арқылы кәсіпкерлер қатысып, сол жерлерді болашақта алып алады. Сондықтан жұмысты қазір қаладан бастап, болашақта бұл тәжірибе жақсы болса 12 ауданға таратамыз.
Бүгінде өңірде кәсіпкерлікті дамытудың орта мерзімді егжей-тегжейлі бағдарламасы әзірленуде. Сонымен қатар облыс орталығында бір терезе жүйесінде қызмет атқаратын кәсіпкерлікті қолдау орталығы ашылмақ.
Авторлары: Е.Жылқайдарұлы, Р.Ғазезов
![](https://s2.save4k.ru/pic/W6hkkYFoLW8/maxresdefault.jpg)