Шетелдіктерге жерді жалға беруге де, сатуға да түбегейлі тыйым салатын Жер кодексінің нормасы бүгін мәжілістің екінші оқылымында мақұлданып, Сенаттың қарауына жіберілді. Яғни, "Жерімізді шетелдіктерге сатпайық" деп қарсылық білдірген талай отандасымыздың ұсынысы заңмен бекітілуге аз қалды. Бірақ, Парламентте әлі "Қазақстан азаматтарына жерді сату-сатпау, жалға беру, бермеу" мәселесі қаралмады. Өйткені арнайы құрылған жер комиссиясы да, депутаттар да әзірге бір байламға келген жоқ.
Жер комиссиясының мүшесі Мұхтар Тайжан "комиссияда ақпараттық та, аппараттық та соғыс болып жатыр" дейді. "Жерді өз шаруаларымызға да жеке меншікке сатпайық" деп келген оған енді бай-манаптардың мүддесін қорғайтын комиссиядағы біраз азамат "жалға алынған жерді екінші адамға да жалға берейік" деп қарсы шығып отыр екен.
МҰХТАР ТАЙЖАН, Жер комиссиясының мүшесі:
– Өзі жұмыс істемей, басқаға субарендаға береді. Өзі мынандай керемет үйде отырып алады. Ештеңе істемей-ақ, жыл сайын ақылы, былай ақша тауып отырады. Субаренданың кесірінен бағасы өседі. Өйткені бекерден бекер бір посредник пайда болды ғой. Ауылда тұрған адамдар мәңгілікке осы құлдыққа айналады!
Ал, мәжілісмен Ержан Құдайберген "мал өсіретіндерге қора-қопсысы мен құдығына қажетті жерді жекеменшігіне сатып, ал мал жаюға жерді жалға берейік" дейді.
ЕРЖАН ҚҰДАЙБЕРГЕН, ҚР Парламенті Мәжілісінің депутаты:
– Мал шаруашылығында жекеменшік болмай ол болмайды. Бір отар қойға мың гектар керек болатын болса оның үй-жай салуына 100 сотық немесе 1 гектар жер керек қора салуға. Басқа жердің қажеті жоқ оған. Сондықтан сол аймақтағы жерді сол азаматқа меншігіне беру керек. Ал жайылым жерлер ол арендада бола берсін.
Ал, депутат Берік Әбдіғалиұлы "егер Жер комиссиясының мүшелері жерді жекеменшікке сатайық" деген ұсынысты Мәжіліске жолдаса Президенттен референдум жасауды сұрап, бұл норманы заңдастырмаймыз" дейді. Яғни, мәжілісмен жерді жекемншікке сатуға түбегейлі қарсы.
БЕРІК ӘБДІҒАЛИҰЛЫ, ҚР Парламенті Мәжілісінің депутаты:
– Мынау жер комиссиясы ештеңе шешпейді. Егер комиссия дауыс алып көпшілік солай шешіп жатса онда мен референдум жасауға ұсынамыз онда! Президентке сондай ұсыныс береміз: халық өзі шешсін онда.
Қазіргі қолданыстағы заң бойынша жерді жалдап отырған шаруалар өзгелерге қосалқы жалға бере алмайды. Елімізде ауылшаруашылығы мақсатындағы жерлер 2003 пен 2016 жылдар аралығында, заң бойынша жекеменшікке сатылды. 13 жылдың ішінде республикамыздағы 218 миллион гектар ауылшаруашылық жердің 1,3 миллион гектары жекеге сатылып кетті.
АЙБАР ТӨЛЖАНҰЛЫ, Тілші:
– Мұхтар Тайжан "осылай тартысып жүргенімізде жерді сатуды ұсынып жүрген азаматтардың мүддесі қорғалып кете ме" деп алаңдайды. Олай болса, тек байлардың дәурені жүреді дейді. "Оған жол бермейміз, референдум жасаймыз" деген депутат Берік Әбдіғалиұлына да кейбір әріптестері қарсылық білдіріп отыр. Осылайша депуттатардың да, комиссия мүшелерінің де пікірі екіге бөлінген. Соған қарағанда алдағы 1-2 айда заңға қажетті нақты нормалар енбеуі мүмкін.
Айбар Төлжанұлы, Дидар Елеуов
Бізді әлеуметтік желіде оқыңыздар:
Youtube -[ Ссылка ]
Facebook - [ Ссылка ]
Instagram - [ Ссылка ]
Vkontakte - [ Ссылка ]
TikTok - www.tiktok.com/@informburo31
WhatsApp Информбюро +7 777 331 31 31
#жер_дауы #мораторий #жер_комиссиясы
![](https://s2.save4k.ru/pic/WUlk6otWOAM/maxresdefault.jpg)