"Тошкент тилсимлари" кўрсатуви
"Ўзбекистон тарихи" телеканали
ШАЙХ ХОВАНДИ ТОҲУР МАЖМУАСИ (Навоий кўчаси, Шайхонтоҳур тор кўчаси) – меъморий ёдгорлик (15–19-асрлар). Шайх Хованди Тоҳур мақбараси, зиёратхона ва гўрхонадан иборат. Мавжуд ёдгорлик 15-асрга оид кўҳна мақбара пойдевори устига 18–19-асрларда қурилган; бунда Мовароуннаҳрда 14-аср охиридан ривожланган икки хонали бўйлама мақбара-мажмуа тарҳлари сақлаб қолинган. Мақбаранинг бино юзасидан сал чиқиб турувчи кичик пештоғи бор, ички деворлари чуқур равоқли. Хоналар гумбазлар б-н ёпилган; гўрхона гумбази қўшқават бўлиб, 12 қиррали асосга ўрнатилган. Зиёратхона меъморлиги ўзига хос хонақоҳ бўлиб, саккиз равоқдан иборат. Дарчалардаги кошинкори панжаралар сақланиб қолган. Мақбара юпқа чорси (25х26х5–6 см) пишиқ ғиштдан терилган. Мақбаранинг ўлчамлари 16,2х8 м, хоналари 6х6 ва 4,2х4,1 м, зиёратхона гумбазининг баландлиги 12,8 м. Кейинроқ атрофига чиллахона, Юнусхон мақбараси (15-аср) қурилган. Уч масжид биноси, минора, Эшонқулидодҳоҳ мадрасаси сақланмаган. Ўтмишда мажмуа Тошкент аҳолисининг зиёратгоҳ қадамжоларидан бири бўлган. Турли байрамларда бу ер сайилгоҳга айланган.
