Երևանի կենտրոնում՝ Զավարյան 57/16 հասցեում, բացվել է նոր սոցիալական ճաշարան՝ նախատեսված 60 և ավելի տարեկանների համար: Նախաձեռնությունը «Արտլանչ» ընկերության համահիմնադիր Բակուր Մելքոնյանինն է, որ սոցիալական ցանցում հայտարարել էր հատուկ տարեցների համար ճաշարան ստեղծելու մտադրության մասին, իսկ գրառումից ուղիղ մեկ տարի հետո այն արդեն իրականություն է: Նոր նախաձեռնության մասին գործարարն առաջինը պատմել է «Երկրորդ շնչառության»-ը՝ հուսալով, որ բոլոր ունկնդիրները կլսեն ու կգան փորձարկելու:
Բակուր Մելքոնյանի խոսքերով, գաղափարը ծագել է այն բանից հետո, երբ սննդի կետերից մեկում ականատես է եղել, թե ինչպես է մի տատիկ դժվարությամբ միջոցները բաշխում իր ուզած ճաշատեսակները գնելու համար, իսկ երբ ինքն առաջարկել է վճարել, տատիկը նեղացել է ու պնդել, թե ինքն ի վիճակի է լուծել իր սննդի հարցը:
«Զգացի, որ տատիկը վիրավորվեց, հասկացա, որ սխալ բան արեցի, իր հայացքն ու այդպես ասելն ազդեց վրաս ու ամբողջ գիշեր մտածեցի այդ մասին: Հասկացա, որ ուզում եմ օգնել, բայց որ չնեղանան, որովհետև ամբողջությամբ անվճար առաջարկելուց գուցե վիրավորվեն, բայց հարգանքով ինչ-որ օգնություն առաջարկել՝ հաշվի առնելով բյուջեն, կարելի է»,- անկեղծանում է նա:
Գաղափարի մասին գրառումը շուրջ կես միլիոն արձագանք է ունեցել, ինչը ամրապնդել է համոզմունքը, որ տարեցների համար սոցիալական ճաշարանն անհրաժեշտություն է:
Արագ հարմար տարածք են գտել կենտրոնում, 67 միլիոն դրամ են ներդրել նորոգման ու կահավորման համար: Գործարարը պատմում է, որ գործարկել են երկու զուգահեռ հոսքագիծ, մեկը՝ սովորական, որից օգտվում են բոլորը, իսկ մյուսը տարեցների համար:
Սովորական գներով օգտվելով առաջին հոսքագծից՝ հաճախորդներն ապահովում են մյուսի աշխատանքն էական ցածր գներով: Ավելին, տեղայնացրել են Գերմանիայի փորձը, խորհրդանշական գնով կարելի է գնել ու տատիկ-պապիկներն հյուրասիրել թեյ, սուրճ, հյութ կամ քաղցրեղեն: Զրուցակիցս վստահ է, որ մշակվել է աշխատող ու փոքր եկամուտ բերող սոցիալական բիզնես, որը կարող է կիրառվել Երևանի մյուս վարչական շրջաններում և մարզային քաղաքներում:
Այն հարցին, թե ինչպես են որոշելու, թե ով է 60-ն անց, գործարարն ընդգծում է, որ հավատալու են տարիքով մարդկանց՝ եթե մարդն ասում է, որ անցել է վաթսունը, ուրեմն, այդպես է, որ կա: Սոցիալական ճաշարանը նախատեսված է նաև հենաշարժողական դժվարություններ ունեցող անձանց համար՝ անկախ տարիքից:
