Да 80-годдзя вызвалення Беларусі ад нямецка-фашысцкіх захопнікаў на Першым нацыянальным канале Беларускага радыё 3 ліпеня адбылася прэм'ера радыёспектакля «Сустрэча з чалавекам» паводле аднайменнага апавядання лаўрэта Дзяржаўнай прэміі Беларусі пісьменніка Барыса Сачанкі. Аўтар належыць да пакалення «дзяцей вайны», і ўжо першы яго празаічны зборнік «Дарога ішла праз лес», які выйшаў у 1960-м годзе, склалі ваенныя апавяданні і аповесці.
Дзеянне ў радыёспектаклі адбываецца летам 1941 года. У цэнтры твора – лёс маладога чырвонаармейца, які трапляе ў палон і цудам з яго вызваляецца. Але першая радасць гэтых уцёкаў змяняецца сумненнямі і разважаннямі параненага, а ці правільна ён зрабіў? Фабула пабудавана на псіхалагічных законах самааналізу галоўнага героя, які нечакана сустракаецца ў лесе з вясковым дзядзькам Апанасам...
Як ствараўся новы радыёспектакль ў 4-й студыі Дома радыё, якія высновы зрабілі для сябе ўдзельнікі пастановачнага праекта, чым захапіла іх проза Барыса Сачанкі ды пра шмат іншых цікавостак стварэння мастацкага вобраза аўдыясродкамі, даведаемся ў эфіры літаратурнага «Творчага вечара» 11 ліпеня ў 21 гадзіну 5 хвілін.
Творчая група радыёспектакля: аўтар інсцэніроўкі, рэдактар і кіраўнік праекта Галіна Шаблінская, рэжысёр-пастаноўшчык Алег Вінярскі, гукарэжысёры Валерый Бяляеў і Ларыса Мараева. Ролі выконваюць: заслужаныя артысты Рэспублікі Беларусь Леанід Улашчанка і Уладзімір Мішчанчук, артыст Кірыл Нікіцін.
![](https://i.ytimg.com/vi/WwLLpzPBULI/maxresdefault.jpg)