Վարչապետի պաշտոնակատար Նիկոլ Փաշինյանը կարծում է, որ տարիներ առաջ Հունան Պողոսյանի կողմից Շանթ Հարությունյանի նկատմամբ բռնություն կիրառելու հրապարակման վերաբերյալ պետք է նոր քննություն անցկացվի։

"Շանթ Հարությունյանն այդ կապակցությամբ ցուցմունք չի տվել, լավ առիթ է, որ նոր քննություն իրականացվի, Շանթ Հարությունյանն էլ հուսամ կօգնի, որ պարզվի իրականությունը։ Ես այսօր խոսել եմ մեր իրավապահների հետ եւ ասել, որ պետք է նոր քննություն անցկացնել հնարավորության դեպքում",– այսօր լրագրողների հետ զրույցում ասաց Նիկոլ Փաշինյանը։

Հիշեցնենք, որ տարիներ առաջ Նիկոլ Փաշինյանը հայտարարել էր, որ Շանթ Հարությունյանն իրեն պատմել է, որ այդ ժամանակվա փոխոստիկանապետ Հունան Պողոսյանն իր նկատմամբ բռնություն է կիրառել։ Նշենք, որ Հունան Պողոսյանն օրերս Փաշինյանի որոշմամբ Սյունիքի մարզպետ է նշանակվել։ Ի դեպ, Սյունիքում քաղաքացիները կրկին փակել են ճանապարհը՝ իրենց բողոքն արտահայտելով Հունան Պողոսյանին մարզպետի պաշտոնում նշանակելու դեմ։

свернуть