Լոռու մարզի գլխավոր դատախազ Հակոբ Ղարախանյանը մարզի տարածքում հանցագործության վիճակի կիսամյակային արդյունքները, մտահոգություններն ու առաջընթացը հանրությանը փոխանցելու նպատակով հրավիրել էր մամուլի ասուլիս՝ մարզի մի շարք լրատվամիջոցների մասնակցությամբ: Միանգամից փարատելով բնակիչների մտահոգությունը՝ դատախազը նշեց, որ 2013-ի առաջին կիսամյակում հանցագործության վիճակը գնահատվում է կայուն՝ նկատի ունենալով հանցագործությունների ընդհանուր թիվը և դրանց որակական կառուցվածքը: Ակնհայտ նվազում է արձանագրվել միջին ծանրության և առանձնապես ծանր հանցագործությունների մասով: Մասնավորապես ավազակության և կողոպուտի դեպքեր չեն արձանագրվել, նախորդ տարվա առաջին կիսամյակի համեմատությամբ սպանության դեպքերը հավասար են՝ 1-1-ի հարաբերությամբ, իսկ սպանության փորձի 2012-ի 2 դեպքի դիմաց այս տարի նման փաստ չկա:
![](https://i.ytimg.com/vi/Wyp85k0Z9dY/mqdefault.jpg)