MGA LAYUNIN
Maibibigay ang kahulugan ng sariling kultura at mga kaugnay na konsepto;
Mailalarawan ang pagkakakilanlang kultural ng kinabibilangang lalawigan/rehiyon;
Matutukoy ang impluwensiya ng ating mga ninuno sa ating pisikal na anyo, relihiyon, kagamitan, panahanan, uri ng pananamit, at pamumuhay.
NILALAMAN NG ARALIN
Kahulugan ng Kultura at mga Sinaunang Pilipino
Kultura ang tawag sa pagkakakilanlan ng bawat pangkat ng mga tao sa isang komunidad. Nagpapakita ito sa paraan ng pamumuhay ng pangkat o grupo ng mga tao tungkol sa kaugalian o tradisyon, wika, paniniwala, pagkain, sining, kasuotan, panahanan, relihiyon, at pamahalaan.
Mga Sinaunang Pilipino
Bago pa man dumating ang mga mangangalakal na Tsino at Hindu, maging ang mga mananakop na Espanyol, ay mayroon nang mga naunang tao na naninirahan sa Pilipinas. Ang pinakaunang Pilipino ay nakapanirahan sa Pilipinas noong Panahon ng Pleistocene o Panahon ng yelo. Nakarating sila sa pamamagitan ng mga tulay na lupa na nagdurugtong sa kapuluan ng Pilipinas sa Asya. Naninirahan sila sa Pilipinas daang libong
taon na ang nakaraan. Sila ang tinatawag na mga sinaunang Pilipino.
Cagayan Man
Tinatawag na Cagayan Man ang naunang uri ng taong naninirahan sa Pilipinas noong Panahon ng Yelo, may 500,000 taon na ang nakalilipas. Nahukay ng mga siyentipiko na tinatawag na mga arkeologo sa Lambak ng Cagayan ang mga kasangkapang bato na ginamit ng mga Cagayan Man at nagpapatunay ng kanilang paninirahan sa naturang lugar.
Pinaniniwalaang ang Cagayan Man ay mahusay sa pangangaso dahil sa mga sandatang bato na nahukay. Ang mga sandatang bato ay kahawig at kasing-edad ng mga nahukay na sandatang bato ng Java Man sa Indonesia at Peking Man sa Tsina. Tinawag ding Homo Erectus Philippinensis ang Cagayan Man dahil ang kahulugan ng homo erectus ay taong may tuwid na tindig.
Tabon Man
Noong Mayo 28, 1962, natuklasan ni Dr. Robert B. Fox, isang Amerikanong Antropologo na Direktor ng Pambansang Museo, ang isang bungo at panga ng tatlong sinaunang tao sa yungib ng tabon sa Palawan. Nanirahan sila sa kweba ng Tabon noong 22,000- 20,000 B.C.E. Tinawag ang natuklasang ito na Tabon Man. Ang Tabon Man ay gumagamit ng mga kasangkapan at lutuang bato. Kabilang sila sa makabagong tao o Homo Sapiens hindi tulad ng Cagayan Man na kabilang sa pangkat ng Homo Erectus.
Mga Negrito
Naglakad ang mga Negrito sa mga tulay na lupa mula sa malawak na lupain ng Asya patungong Pilipinas nang bumabaw ang mga karagatan dahil sa panahon ng yelo. Nomadiko o pagala-gala ang mga sinaunang negrito. Ang iba ay tumira sa mga yungib at ang iba ay sa itaas ng mga puno sa mga bundok. Nangangalap sila ng mga prutas, halamang-ugat, gulay at iba pang halamang maaaring kainin. Nangingisda at nangaso
rin sila. Maliit lamang ang nga negrito. Umaabot ang kanilang taas sa apat na talampakan. Maitim ang kanilang balat, pango ang ilong, makapal ang mga labi, at kulot na kulot ang maiitim na mga buhok.
Ninunong Austronesyano
Ayon kay Peter S. Bellwood, isa ang Pilipinas sa Asya na pinanirahan ng mga Austronesyano. Ang mga sinaunang taong ito ay lumikas at nakarating sa Luzon sa hilaga ng Pilipinas, sa Borneo, at sa Indonesya.
Itinuro nila ang kanilang kasanayan sa paglalayag maging ang paggawa ng malalaki at na bangka. Ibinahagi nila ang pagsasaka gamit ang mga araro at mga pambungkal ng lupa. Mayroon silang alpabetong ginagamit sa pagsulat. Tinatawag itong Baybayin na kahalintulad ng alpabetong Tagalog. Naniiwala sila sa mga anito at gaba. Karaniwang kakikitaan ng tato sa katawan ang mga kalalakihan. Kakikitaan din sila sa pagbuo at pagdidibuho ng mga may disenyong banga, palayok, at tapayan.
Ang mga Austronesyano ay mayroon din silang sariling musika na karaniwang ginagamitan ng gamelan, isang orkestra ng xylophone at metallophone (o isang instrumento na binubuo ng mga baretang metal at pinupukpok ng maliit na maso para tumunog). Gumamit rin sila ng kulintang (o gong na nagsisilbing drum), gansa (o mga baretang metal na katunog ng gong), at mga tambol na may guwang.
Ang pinakamahalagang kontribusyon ng mga
Austronesyano sa bansa ay ang iba-ibang wika sa
Pilipinas na nagmula sa wikang Austronesyano o
Malayo-Polynesian.
![](https://i.ytimg.com/vi/Z4vTqmeL2jA/maxresdefault.jpg)