Додситонии шаҳри Душанбе рӯзи 17 майи соли 2023 дар саҳифааш дар Фейсбук дар вокуниш ба муроҷиатномаи Шоира Зуҳурова ба Рустами Эмомалӣ ва Озода Раҳмон дар бораи сабабҳои марги духтари ноболиғаш Севинч Шукурова хабар дод, ки дар робита ба ин ҳолат рӯзи 16 майи соли 2023 аз ҷониби додситонии ноҳияи И.Сомонии шаҳри Душанбе нисбат ба духтури ҷарроҳи муассисаи давлатии “Маркази шаҳрии ёрии таъҷилии тиббӣ” Ҳоҷиев Абдурасул Муҳаммадиевич парвандаи ҷиноятӣ бо аломатҳои қисми дуюми моддаи 129-уми Кодекси ҷиноятии Ҷумҳурии Тоҷикистон (иҷрои номатлуби вазифаи касбӣ аз ҷониби корманди тиб, ки аз беэҳтиётӣ боиси марги инсон шудааст) оғоз гардида, нисбаташ чораи пешгирӣ дар намуди ба ҳабс гирифтан татбиқ карда шуд.
Додситонии пойтахти Тоҷикистон гуфт, тафтиши пешакии ин парвандаи ҷиноятӣ идома дорад. Ба Абдурасул Ҳоҷиев бар асоси ин банди қонун ҳамчун ҷазо аз 5 то 8 соли зиндон бо маҳрум кардан аз ҳуқуқи ишғоли мансабҳои муайян ё машғул шудан бо фаъолияти муайян ба мӯҳлати то 5 сол таҳдид мекунад.
Худи Ҳоҷиев ва наздиконаш барои шарҳи қазия феълан дастрас нестанд, вале додситонӣ гуфт, рӯзи 8 апрели соли 2023 ҳодисаи фавти нобаҳангоми ноболиғ Шукурова Севинч, соли таваллудаш 2006, аз ҷониби додситонии ноҳияи И.Сомонӣ аз лаҳзаи ба вуқуъ омадани ҳодиса мавриди санҷиш қарор дода шуда, бо мақсади муайян кардани сабаби марги номбурда ва ҷой доштани ҳолати номатлуб иҷро кардани вазифаҳои касбӣ аз ҷониби духтурон, худи ҳамон рӯз ташхиси комиссионии суди-тиббӣ таъин гаштааст.
“Бо назардошти ҷиддият ва хусусияти гузаронидани ташхиси комиссионии судӣ-тиббӣ хулосаи коршиносон 16 майи соли 2023 омода ва ба прокуратура пешниҳод гардид, ки тибқи он, сабаби марги ноболиғ Шукурова С. пайдо шудани садамаи анафилактикӣ аз маҳлули дорувории “Лидаза” буда, ки аз ҷониби духтури ҷарроҳ Ҳоҷиев Абдурасул Муҳамадиевич бе зарурият таъин ва гузаронида шудааст. Дар натиҷаи номатлуб иҷро намудани вазифаҳои касбӣ аз ҷониби духтур-ҷарроҳ Ҳоҷиев А.М. ҳолати ноболиғ Шукурова С. вазнин гардида, номбурда фавтидааст”, - гуфта мешавад дар иттилоияи додситонии Душанбе.

свернуть