Dünyamızda yaşayan 5 qeyri-adi insan.
Bu gün izləyəcəyimiz videoda 60 ildir çimməyən, 11 yaşından yeməkdən və içməkdən imtina edən, heç vaxt yatmayan və qocalmayan insanlar haqqında danışacağıq.
Kaylaş Sinqx. “Ən iylənən adam”. Kaylaş 1974-cü ildə evlənəndən sonra heç vaxt çimməmək qərarına gəlib. Ümid edirdi ki, icra etdiyi dini ritual ona oğul atası olmaqda kömək edəcək. Dediyinə görə, din xadiminin yanına gedərək arzusunu bildirib. Din xadimi də Kaylaşı əmin edib ki, əgər onun məsləhətinə əməl edib çimməsə və tüklərini qırxmasa Tanrı ona oğul ərməğan edəcək. Hazırda “dünyanın ən iylənən adamı” çənəsində 182 sm uzunluğunda çirkli və iy verən saqqal gəzdirir. Bütün fədakarlığına baxmayaraq, yeddi qız atası olan Kaylaşa Tanrı hələ də oğul payı verməyib. Oğul ümidiylə yanıb-tutuşan Kaylaş isə arzusuna çatmayınca əhdinə əməl edəcəyini deyir... Nəzərə alsaq ki, Sinqxin 66, xanımının isə 60 yaşı var, onun bu arzuya çatması şübhəli görünür... Əgər o, dağlıq, soyuq ərazidə, hamıdan uzaqda yaşasaydı, onun iylənməsi insanlara elə də təsir etməzdi. Amma Kaylaş Hindistanın tropik iqlimində, Varanasi şəhərində yaşayır, özü də heyvan otarır, bütün gün günəşin altında bir otlaqdan o birisinə qaçır... Arvadı deyib ki, ərinin iyinə alışmaq üçün ona uzun illər lazım olub. Ətrafındakı insanlar və qohumları Kaylaşı bu əməlindən çəkindirməyə cəhd etsə də, heç nə alınmayıb. Hətta, bir dəfə qohumları yığılıb onu məcburi çaya tullamaq qərarına gəliblər. Kaylaş isə ordan qaçıb və uzaqdan çığırmağa başlayıb: “Ölərəm, yuyunmaram!”. Sizdə sual yarana bilər ki, bu cür isti iqlimdə illərlə yuyunmayan biri necə olur ki, xəstələnmir? Bu sual Kaylaşın özünə də ünvanlanıb. O isə cavabında bildirib ki, “şəxsi gigiyenasına diqqət edir”. Bundan əlavə, hər axşam özünü odla təmizlədiyini və öz tanrısına dua etdiyini deyir.
Qoca Amu. “60 ildən çoxdur ki, yuyunmur...” Tanış olun, bu, İrandan olan Amudur. Onun dərisinə o qədər çirk, toz yığılıb ki, dərisi torpaqdan seçilmir. Üzü, demək olar ki, görünmür, qoxusu isə uzaqdan duyulur. Dərisi insan dərisinə yox, fil dərisinə bənzəyir. O, köhnə, uçuq-sökük kərpic binada yaşayır. Ən maraqlı məşğuliyyəti “çəkməkdir”. Qoca Amu kanalizasiya borusunu müştük kimi istifadə edərək, içinə quru peyin doldurub çəkir. Kimsə ona siqaret hədiyyə edəndə verilən bütün siqaretləri eyni anda yandırıb çəkir. Ölmüş heyvan cəsədlərini tapır, onları közdə bişirib yeyir. Onun niyə bu cür yaşadığının sirrini heç kim bilmir. Qoca Amu öz ibtidai həyat tərzinin çoxunu ya yatmaq, ya da gün altında isinməklə keçirir.
Sadhu Bharati. “40 ildir əli göydədir”. Bu hindli din xadimi 40 ildən çoxdur ki, sağ əlini başından yuxarıda tutur. Onun sağ əli artıq əl olmaqdan çıxıb. Çünki quruyub və çöpə dönüb. O, ilk dəfə Tanrı Şivaya itaət üçün sağ əlini qaldırıb. Tanıyanların sözünə görə, əvvəllər Sadhu adi həyat tərzi keçirib: üç uşaq atası kimi işləyib və ailəsini dolandırıb. Bir gün səhər qəfildən anlayıb ki, o, özünə və ailəsinə deyil, Tanrıya məxsusdur. Beləcə, Sadhu yollara düşür, bir neçə il Hindistanın müxtəlif məbədlərini gəzir. Bir gün də əhd edərək əlini yuxarı qaldırır və and içir ki, əlini heç vaxt aşağı salmayacaq. Bəzilərinin fikrincə, onun bu hərəkəti öz günahlarından qurtulmaq üçündür. 40 il işlədilməyən əl isə quruyub. Atrofiyaya uğramış barmaqlar, uzanmış və əyilmiş dırnaqlar... Sadhu etiraf edib ki, ilk vaxtlarda o, çox ağrılar çəkib. Amma bu ağrılara mətanətlə dözüb. Əhdinə xilaf çıxmayıb. Hazırda isə qolunda heç bir ağrı hiss etmədiyini deyir. Əksinə, o, qoluna baxaraq insan iradəsinin çox şeyə qadir olduğunu xatırlayır, Tanrılara itaəti və daxili sükutunu əldə etdiyini bildirir. Bu arada, artıq onun davamçıları da peyda olub. Biri 7, digəri 30 ildir ki, “əli yuxarıda gəzir”. Bu cür əhdlər bizim üçün qeyri-adi gəlsə də, hindlilər üçün bu, çox normal və qürurverici bir haldır. Hindistanda 10 il danışmamaq, bütün ömür boyu ayaqüstə durmaq kimi əhdlərə də rast gələ bilərsiniz. Bəs görəsən, Sadhu yatanda neynir?
Yakov Çiperoviç. “Yuxusuz adam”. Almaniyada qeyri-adi və heyrətamiz bir insan yaşayır. Onun hekayəsi belədir: 1979-cu ildə yemək zəhərlənməsi nəticəsində o, klinik ölüm keçirir. Bu klinik ölüm 1 saat davam edir. Bu, tibbi cəhətdən qeyri-mümkün sayılan bir haldır. Axı, baş beyinin hüceyrələri klinik ölümün ilk 3-5 dəqiqəsində ölməyə başlayır. Amma ən maraqlısı odur ki, Yakov klinik ölümdən ayıldıqdan sonra yatmaq qabiliyyətini itirib. O, hətta, uzana bilmir. Uzanmaq istəyən kimi, sanki hansısa bir qüvvə onu itələyir. 16 il uzanmağa həsrət qalan Yakovun həyatını yoqa dəyişir. Uzun yuxusuz illərdən sonra 1995-ci ildə o, yoqa ilə məşğul olmağa başlayıb. Meditasiya və digər Şərq təbabət növlərindən istifadə edərək sonunda bədənini uzanmağa öyrəşdirə bilib. Amma bu hal da 2 saatdan artıq sürə bilmir.
