Սիրելի՛ մայրիկներ,
Կրծքով կերակրումը մեր բալիկների կյանքում ամենամեծ ու կարևոր փուլերից է, որն օգնում է ձևավորել բալիկի ֆիզիկական, հուզական և հոգևոր առողջությունը։ Որքան էլ գիտությունը զարգանա և կաթնախառնուրդը կատարելագործվի՝ այն չի կարող հավասարվել մայրական կաթին։ Եթե չկա այլընտրանք, ապա միանգամայն հասկանալի է բալիկին կաթնային խառնուրդով կերակրելը։ Սակայն եթե ունեք ընտրելու հնարավորություն՝ բալիկին մի զրկեք իր համար ստեղծված կաթիկից։
Չկա տարիք, երբ մայրական կաթը կորցնում է իր օգտակարությունը և կարող է փոխարինվել որևէ այլ կաթով։ Մայրական կաթն ունի փոփոխվելու հրաշալի յուրահատկություն, որը ենթադրում է, որ այն հարմարվում է մեր բալիկի օրգանիզմի պահանջներին։ Այսինք բալիկը կաթիկից ստանում է այն, ինչ իրեն այդ պահին անհրաժեշտ է։ Հենց այս տրամաբանությունից ելնելով՝ եկեք փորձենք կերակրել մեր փոքրիկներին այնքան երկար, որքան հնարավոր է։
Մի քանի մասից բաղկացած տեսանյութերում կխոսեմ կրծքով կերակրման հետ կապված ամենակարևոր թեմաների շուրջ՝ առաջին կերակրում, լակտացիա, կաթի կթում, պահեստավորում և պահպանում, կրծքերի դատարկում, կերակրման տևողություն, կաթիկի ազդեցությունը գազիկներ ունենալու վրա, առաջնային և երկրորդային կաթ և այլն։
Նշեմ, որ ես մասնագետ չեմ և չունեմ բժշկական կրթություն։ Ցանկացած հարցի կամ խնդրի դեպքում, խնդրում եմ, դիմեք ԿԿ մասնագետի։
ես ունեմ 6․5 ամսական բալիկ, ում հետ ունեցած իմ փորձով եմ կիսվում տեսանյութերում։
Մեկնաբանություններում պատմեք մեզ ՁԵր փորձի մասին, առնչված խնդիրների, ունեցած հարցերի մասին։ Սիրով կկարդամ այլ մայրիկների փորձը։
Եթե կա թեմա, որի շուրջ կցանկանաք լսել ավելի մանրակրկիտ կարծիք՝ մի մոռացեք նշել այն։
Շնորհակալություն։
