ང་ཚོའི་ལུས་སེམས་གཉིས་ཀྱི་འཕྲོད་བསྟེན་ཐོག་དུས་རྒྱུན་ནས་ཐུགས་སྣང་དགོས་པ་ཞིག་ཡིན་ལ་ལུས་སེམས་གཉིས་ཀྱི་འཕྲོད་བསྟེན་ཡག་པོ་ཡོང་བའི་ཐབས་ལམ་ཡང་མང་དག་ཞིག་ཡོད་པའི་ནང་ནས་དེང་སྐབས་ཡོ་ག་དེ་བཞིན་དར་སྲོལ་ཆེན་པོ་ཞིག་ཆགས་ཡོད། དེ་རིང་ང་ཚོའི་བོད་ཀྱི་ལོ་གསར་གྱི་དུས་སྟོན་སྲུང་བརྩི་དང་འབྲེལ། ང་ཚོ་ཚང་མས་ལོ་གསར་པ་འདིའི་ནང་སྤྱིར་བཏང་ལུས་སེམས་གཉིས་ཀྱི་འཕྲོད་བསྟེན་ཡག་པོ་ཡོང་བར་ཟས་སྤྱོད་བསྟེན་སྟངས་དང་། ཡོ་ག་ངོ་སྤྲོད། དེ་བཞིན་ཉིན་རེའི་བྱ་བཞག་ནང་ཚང་མས་གནང་ཐུབ་པའི་ཡོ་ག་ཁག་གཅིག་གཟིགས་འབུལ་ཞུ་གི་ཡིན། ལས་རིམ་འདི་བཞིན་ཡོ་ག་སློབ་ཁྲིད་པ་བསྟན་འཛིན་ཉི་མ་ལགས་ཀྱིས་ངོ་སྤྲོད་གནང་གི་རེད། བསྟན་འཛིན་ཉི་མ་ལགས་ནི་ནམ་རྒྱུན་ནས་རང་ཉིད་ཀྱི་ལུས་སེམས་གཉིས་ཀྱི་འཕྲོད་བསྟེན་ཐོག་དོ་སྣང་ཆེན་པོ་གནང་མཁན་ཞིག་དང་། སྤྱི་ཚོགས་ཞབས་ཞུའི་ལས་དོན་ཐོག་ལོ་ངོ་ ༡༠ ལྷག་གི་ཉམས་མྱོང་ཡོད་པ་ཞིག་རེད་འདུག མ་ཟད་ཁོང་གིས་མངའ་སྡེ་དང་རྫོང་གི་ལུས་བྱད་འགྲན་རྩེད་ནང་ལའང་མཉམ་བཞུགས་གནང་ཡོད་པ་རེད། ལས་རིམ་འདི་བཞིན་ལོ་གསར་པ་འགོ་འཛུགས་དང་འབྲེལ་ཚང་མའི་ལུས་སེམས་གཉིས་ཀྱི་འཕྲོད་བསྟེན་ཐོག་ཐུགས་ཕན་གསོ་བའི་རེ་བ་ཞུ་གི་ཡིན།
