Օգոստոսի 6-ին և 7-ին Սևանը շնչում էր բազմազգ ու բազմաոճ երաժշտությամբ, որը միավորել էր տեղացիներին և հյուրերին, զբոսաշրջիկներին և երաժշտության սիրահարներին:
Երկու տարվա դադարից հետո ինքնատիպ այս փառատոնը, «Շնորահակալություն ասենք Սևանին» կարգախոսով, թարմություն ու նոր լիցքեր հաղորդեց մասնակիցներին:
«Սևան» երիտասարդական ակումբ» ՀԿ-ի հեղինակած փառատոնը լուրջ հայտ է ներկայացնում երաժշտական աշխարհում, միաժամանակ հանրահռչակում մի շարք գաղափարներ, որոնք արդիական են:
Արդեն 3-րդ անգամ փառատոնն անցկացվում է ոչ միայն Սևանա լճի ափին` թիվ 1 հանրային լողափում, այլ նաև քաղաքում, այս անգամ` քաղաքային զբոսայգում, որտեղ կառուցված է փառատոնային բեմահարթակ:
Երաժշտական այս փառատոնը Սևանի նկատմամբ վերաբերմունքի արտահայտման ինքնատիպ ձևաչափ է, որն օգնեց ոչ միայն մեր շնորհակալությունը հայտնել լճին, այլ նաև լճի միջոցով ի ցույց դնել մի շարք խնդիրներ, վեր հանել բնապահպանական հիմնահարցեր:
Կազմակերպիչները վստահեցնում են, որ փառատոնը լավագույն հարթակ է տարածաշրջանի ներկայացման, նոր գաղափարների կյանքի կոչման համար:
Փառատոնին մասնակցեցին 18 երաժշտական խմբեր Հայաստանից, Արցախից, Ռուսաստանից, Ֆրանսիայից և Ավստրիայից:
Երկօրյա փառատոնը համախմբման հիանալի հնարավորություն ընձեռեց. միմյանց հանդիպեցին Հայաստանի և արտերկրի տարբեր երաժշտախմբեր, անհատ կատարողներ, խմորվեցին նոր գաղափարներ, հենց տեղում ծնվեցին երաժշտական կատարումներ: Միաժամանակ փառատոնը ձեռքբերեց նոր գործընկերներ, որոնք միացան արդեն տարիներ շարունակ փառատոնի կազմակերպիչների կողքին կանգնած անհատներին և կազմակերպություններին:
Կայացավ հերթական փառատոնը, որը, անկախ եղանակային կանխատեսումների և անակնկալների, պարգևեց երաժշտական տոն` լի անակնկալներով, լավ երաժշտությամբ, տրամադրություն ստեղծող պահերով և դրական զգացողություններով:

свернуть